Biserko për sulmin në veri: Fakti që Perëndimi mbështeti me shpejtësi qeverinë e Kosovës, shumë domethënës

Sonja Biserko, kryetare e Komitetit të Helsinkit për të Drejtat e Njeriut në Serbi, ka analizuar ngjarjet e fundit në Kosovë, duke i vendosur ato në një kontekst më të gjerë gjeopolitik.

Ajo lidh zhvillimet në rajon me ndryshimet e mundshme në politikën e jashtme amerikane pas fitores së Donald Trumpit në zgjedhjet presidenciale.

Sipas Biserkos, fitorja e Trumpit mund të sjellë pasiguri të reja në Ballkanin Perëndimor dhe të ndryshojë qasjen strategjike të SHBA-së ndaj Evropës, raporton Danas.

Ajo vëren se politika izoluese e Trumpit ka inkurajuar Evropën të fokusohet tek vetja, ndërsa ndikimi i dobësuar i NATO-s dhe marrëdhëniet më pak strategjike mes SHBA-së dhe BE-së hapin rrugën për aktivitete hibride ruse në rajon.

Duke iu referuar aktit të fundit terrorist në veri të Kosovës, Biserko thekson se ky incident ka vendosur Ballkanin Perëndimor në vëmendjen kryesore të sigurisë për Perëndimin.

Lexo po ashtu DASH dënon sulmin ndaj kanalit të Ibër-Lepencit: Do të mbështesim përpjekjet për të gjetur dhe ndëshkuar përgjegjësit

Ajo shton se reagimi i shpejtë i Perëndimit në mbështetje të qeverisë së Kosovës tregon se qendrat e inteligjencës europiane mund të kenë informacione për organizatorët e sulmit.

“Akti terrorist në Kosovë duhet parë në atë kontekst evropian. Fakti që Perëndimi reagoi me shpejtësi dhe mbështeti qeverinë e Kosovës është shumë tregues sepse qendrat evropiane të inteligjencës ndoshta kanë informacion se kush qëndron pas atij akti”, deklaroi Biserko.

Michael Roth, deputet i parlamentit gjerman, ka deklaruar se këto metoda terroriste ngjajnë me praktikat ruse dhe ka paralajmëruar se, nëse Serbia qëndron pas tyre, kjo mund të çojë në përfundimin e negociatave të BE-së me Serbinë.

Biserko vëren se situata aktuale vendos Serbinë në një pozitë të ndjeshme, veçanërisht duke pasur parasysh trazirat e brendshme dhe protestat në vend.

Lexo po ashtu Sulmi terrorist në Ibër-Lepenc, Vuçiq: Tentim për sulm hibrid mbi Serbinë – të gatshëm për bashkëpunim në hetime

Ajo sugjeron se Vuçiq mund të përdorë incidentin për të larguar vëmendjen nga problemet e brendshme, ndërsa njëkohësisht përpiqet të përfitojë nga fitorja e Trumpit dhe ndryshimet e mundshme në politikën ndërkombëtare.

Biserko përfundon duke thënë se Ballkani Perëndimor mbetet një fushëbetejë e rëndësishme strategjike në kontekstin e rivaliteteve globale dhe se stabiliteti i rajonit varet nga përgjigja e fuqishme dhe e koordinuar e Perëndimit./Telegrafi/