Biseda telefonike me Chollet, Zyra e kryeministrit: Kurti i gatshëm për takime të nivelit të lartë politik

Zyra e kryeministrit Albin Kurti sot ka bërë të ditur për bisedën telefonike të kryeministrit Albin Kurti me këshilltarin amerikan Derek Chollet.

Në njoftimin për media bëhet e ditur se kanë diskutuar për propozimin evropian, të pranueshëm si bazë të mirë për bisedime të mëtejme dhe platformë solide për të ecur përpara drejt normalizimit të plotë të marrëdhënieve ndërmjet Kosovës dhe Serbisë në kuadër të dialogut në Bruksel.

Lexo po ashtu Chollet bisedon me Kurtin: Është momenti për ta zbatuar propozimin e BE-së për normalizimin e marrëdhënieve Kosovë-Serbi

“Gjithashtu, u theksua rëndësia e avancimit për Kosovën në integrime ndërkombëtare në kohën kur të arriturat demokratike dhe ekonomike të Kosovës në këto dy vitet e fundit janë evidentuar nga shumë organizata e institute ndërkombëtare prestigjioze”, thuhet në njoftim.

Sipas kryeministrisë, Kurti konfirmoi gatishmërinë e tij për takime të radhës të nivelit të lartë politik dhe shprehu pajtimin e tij për nevojën për intensifikim të procesit të dialogut.

“Republika e Kosovës mbetet e përkushtuar dhe konstruktive në dialog sepse dëshiron marrëdhënie të mira fqinjësore dhe integrim në BE dhe NATO”, thuhet në njoftim. /Telegrafi/