Bimë narkotike të rrethuara me granata dhe kamera në Tropojë, arrestohet 51-vjeçari

Policia e Shtetit ka njoftuar sot se ka zbuluar një parcel me bimë narkotike, të rrethuar me kamera sigurie dhe granata gati për shpërthim në pyllin e fshatit Kovaç, në Tropojë.

Në përmbyllje të operacionit, policia ka kapur dhe vënë në pranga njërin nga autorët dhe ka shpallur në kërkim autori tjetër.

“Këta shtetas janë të dyshuar si autorë edhe të një rasti tjetër të kultivimit të bimëve narkotike, në vitin 2020”, ka shtaur policia.

Në zbatim të vendimit të gjykatës për arrestimin e autorëve u organizua dhe u finalizua me sukses operacioni policor i koduar “Sofistikimi”, si rezultat i të cilit u bë kapja dhe ndalimi i shtetasit A. H., 51 vjeç, banues në fshatin Kovaç dhe shpallja në kërkim e bashkëpunëtorit të tij, shtetasit B. Ç., 22 vjeç, banues në fshatin Kovaç.

“Bazuar në provat e siguruara, rezulton se këta shtetas, më datë 28.09.2021, në pyllin e fshatit Kovaç, në bashkëpunim me njëri-tjetrin, kanë kultivuar bimë narkotike, përreth të cilave kishin lidhur me fill sintetik 2 granata ofensive, si dhe kishin vendosur kamera, për të monitoruar zonën”, ka sqaruar policia.

Policia ka shtuar gjithashtu se këta shtetas, në bashkëpunim me njëri-tjetrin, dyshohen se në muajin korrik të vitit 2020, kanë kultivuar bimë narkotike, në fshatin Hoxhaj. Për këtë rast ishte regjistruar procedimi penal në Prokurori.

Vijon puna për kapjen e shtetasit B. Ç., identifikimin dhe kapjen e personave të tjerë të dyshuar të përfshirë në këtë veprimtari kriminale. /Telegrafi/