Berisha: Sulmet ndaj Policisë janë planifikuar kohë më herët, institucionet e sigurisë të qëndrojnë vigjilentë

Kryetari i Komisionit për Çështje të Sigurisë dhe Mbrojtjes, Bekë Berisha ka reaguar sot pas sulmeve që i janë bërë Policisë së Kosovës. 

Berisha në një postim në Facebook shkruan se invazioni rus në Ukrainë është plan i hershëm i përgatitur nga shërbimet e këtij shteti, ndërsa theksoi se edhe sulmet e tilla si këto ndaj Policisë së Kosovës janë të planifikuara kohë më herët.

Ai kërkoi nga institucionet e sigurisë të qëndrojnë vigjilente dhe të vendosura që të zbatojnë ligjin në tërë territorin e Kosovës, sulmeve terroriste t’u përgjigjen me vendosmëri, me dyfishin e forcës.

Lexo po ashtu Sulm ndaj Policisë në veri, Sveçla e quan akt terrorist

Lexoni të plotë postimin e tij:

Invazioni rus në Ukrainë është plan i hershëm i përgatitur nga shërbimet e këtij shteti. Pasi që Rusia ka ngecur dhe është ndalur nga rezistenca e pashoq e Ukrainasve, synimet e saj janë destabilizimi i Ballkanit Perëndimor.

Sulmet e tilla si këto ndaj Policisë së Kosovës janë të planifikuara kohë më herët. Institucionet e sigurisë duhet të qëndrojnë vigjilente dhe të vendosura që të zbatojnë ligjin në tërë territorin e Kosovës, sulmeve terroriste t’u përgjigjen me vendosmëri, me dyfishin e forcës.

Kujtojmë se këto sulme vijnë pas furnizimit me armë ofanzive nga Kina nga shteti serb, duke realizuar pikë për pike planet e Putinit, si  dhe pas deklaratave nxitëse të Vuçiqit.

Qytetarët e Kosovës nuk duhet të panikohen, por e kemi obligim që ta mbushim Fondin për Siguri. Përtej vendit tonë nuk kemi ku të shkojmë.

Në këtë situatë jemi gjithë bashkë, gjithmonë të gatshëm në mbrojtje të Atdheut. /Telegrafi/