Gjysma e parë e takimit në Commerzbank Arena përfundoi pa gola, ndërsa për këtë ishin fajtorë vetë mysafirët, të cilët patën raste shënimi. Shansin më të mirë e pati David Alaba, i cili dështoi të shënonte nga pika e bardhë, pasi Mueller nxori një penalti.
Goli i bavarezëve erdhi në pjesën e dytë. Philipp Lahm dërgoi një pasim drejt Bastian Schweinsteiger dhe mesfushori gjerman shënoi golin e epërsisë (52’).
Shqiptari me pasaportë zvicerane, Xherdan Shaqiri, luajti nga minuta e parë në këtë ndeshje, në vend të të lënduarit Toni Kroos. Ai pati një rast të shkëlqyer në pjesën e parë, ndërsa në të dytën e futi topin në rrjet, por goli u anulua për pozitë jashtë loje.
Bayern Munichu ka 20 pikë diferencë nga përcjellësi i parë, Borussia Dortmund, kur kanë mbetur edhe gjashtë javë për t’u zhvilluar (18 pikë). Ky është titulli i 23-të i Bundesligas për kampionin e ri gjerman.
Këtë sezon bavarezët janë në rrugë të mirë për ta fituar tripletën, pasi luajnë në gjysmëfinale të DFB Pokal kundër Wolfsburgut dhe kanë dy gola epërsi ndaj Juventusit nga takimi i parë çerekfinal i Ligës së Kampionëve. /Telegrafi/
