Mes spekulimeve për largime të mundshme në janar, Roony Bardghji ka mohuar çdo zë që e lidh me një largim nga Barcelona.
Pavarësisht minutave të kufizuara që nga transferimi i verës nga FC Copenhagen, ai deklaroi për Fotbolskanalen se ndihet mirë te klubi dhe ka marrë besimin e trajnerit Hansi Flick.
“Kjo është ajo që shkruajnë mediat. Por kam kaluar shumë mirë dhe kam një marrëdhënie të mirë me Hansin, i cili është një trajner i mrekullueshëm. Ai dhe klubi më besojnë, gjë që do të thotë shumë. Ndihem shumë mirë. Po përmirësohem çdo ditë dhe po mësoj shumë. Kam pasur mjaft kohë loje, kështu që ndihem shumë mirë. Jam i duruar. Kam qenë këtu për tre ose katër muaj”, ka thënë Bardghji.
Bardghji theksoi se po përmirësohet çdo ditë dhe se durimi është pjesë e procesit, duke kujtuar se ka vetëm pak muaj në Katalonjë.
Ai foli edhe për debutimin në El Clasico, të cilin e përshkroi si një përvojë të paharrueshme pavarësisht humbjes së Barcelonës.
“Është ndeshja më e rëndësishme dhe mund ta ndieje në media, kudo, madje edhe para ndeshjes. Kishte shumë intensitet në fushë dhe më pas. Nuk mora pjesë por ndodhën shumë gjëra. Ka shumë emocione, sepse është një ndeshje e rëndësishme dhe një rivalitet i madh. Është normale, por ishte e mrekullueshme të isha atje”.
Megjithëse konkurron me Lamine Yamal në krahun e djathtë, Bardghji shihet si një opsion i vlefshëm për Flick, ndaj largimi i tij në janar nuk pritet të ndodhë, pavarësisht situatës financiare të klubit. /Telegrafi/
