Banka Botërore: Pandemia COVID-19 një goditje shkatërruese për ekonominë botërore

Pandemia e COVID-19 do të jetë një goditje shkatërrimtare për ekonominë e botës. Kështu thotë presidenti i Bankës Botërore, David Malpass.

Ai paralajmëron se mënyra e jetesës së miliarda njerëzve do të preket nga pandemia dhe se rënia ekonomike mund të zgjasë për një dekadë.

Në muajin maj, Malpass paralajmëroi se 60 milionë njerëz mund të shkojnë në varfëri ekstreme nga efektet e Coronavirusit.

Banka Botërore e përcakton varfërinë ekstreme si jetesë me më pak se 1.90 dollarë për person në ditë.

“Kombinimi i pandemisë me izolimet, ka bërë që jetët e miliarda njerëzve të ndryshojnë. Kjo është shqetësuese. Pasojat direkte, do me thënë humbja e të ardhurave, por edhe ato shëndetësore dhe sociale, janë shumë të rënda”, tha ai në një intervistë për BBC, përcjell Telegrafi.

Banka bashkë me institucionet e tjera të ngjashme, kanë ofruar mbështetje për vendet më të prekura të botës por thotë se nevojitet shumë më tepër.

Ajo po i kërkon huadhënësve komercialë si bankat dhe fondet e pensioneve, të ofrojnë lehtësira për borxhet ndaj vendeve të varfra. /Telegrafi/