Azerbajxhani refuzoi një takim me krerët e Armenisë, Gjermanisë dhe Francës për shkak se nuk ishte i ftuar Erdogan

Presidenti i Azerbajxhanit, Ilham Aliyev refuzoi të marrë pjesë në takimin me liderët e Armenisë, Francës, Gjermanisë dhe Këshillit Evropian, i cili supozohej të mbahej në qytetin spanjoll të Granadës më 5 tetor (nesër).

“Azerbajxhani refuzoi të marrë pjesë në takimin që ishte planifikuar të mbahej në Granada, Spanjë më 5 tetor”, thuhet në deklaratë.

Sipas agjencisë së lajmeve AP, Azerbajxhani propozoi të ftohej edhe presidenti turk, Recep Tayyip Erdogan, por Parisi dhe Berlini e kundërshtuan idenë. Kjo raportohet se ishte arsyeja kryesore për anulimin e takimit.

Një arsye tjetër, sipas agjencisë së lajmeve, ishin deklaratat e fundit pro-armene të Francës dhe Presidentit të Këshillit Evropian, Charles Michel. Azerbajxhani, për shembull, vuri në dukje planet e Francës për ta furnizuar me armë Armeninë, raporton armenpress.

Për më tepër, Baku ndihet i detyruar të diskutojë çështjet rajonale me vendet që ndodhen larg zonës në fjalë. Agjencia e lajmeve thekson se Azerbajxhani mund të marrë pjesë në një takim trepalësh që përfshin Armeninë dhe BE-në.

“Asnjë format në të cilin merr pjesë Franca nuk është i pranueshëm për Azerbajxhanin. Baku nuk do të marrë pjesë në një platformë të tillë”, thuhet në raport.

Takimi ishte planifikuar të zhvillohet në margjinat e samitit të Komunitetit Politik Evropian. Udhëheqësit e Azerbajxhanit dhe Armenisë u takuan më parë në margjinat e samitit të Komunitetit Politik Evropian në Pragë dhe Kishinau.

Në takimin e fundit, në Pragë, morën pjesë presidenti francez, Emmanuel Macron dhe Charles Michel. Franca, Gjermania dhe BE-ja morën pjesë në bisedimet në Kishinau. /Telegrafi/