Azerbajxhani pezullon dërgimin e gazit në Serbi

Azerbajxhani ka pezulluar furnizimin me gaz për Serbinë për shkak të disa problemeve të brendshme.

Kështu së paku ka njoftuar sot presidenti serb, Aleksandar Vuçiq, i cili ka dhënë disa detaje, shkruan danas.rs.

“Jemi njoftuar nga Azerbajxhani se, për shkak të problemeve që kanë, nga sot nuk mund të llogarisim më në 1.7 milionë metër kub gaz që vjen në vendin tonë çdo ditë”, tha ai ndërsa theksoi se Serbia do të fillojë të përdorë rezervat e saj derisa situata të normalizohet.

Lexo po ashtu SHBA-ja sanksionon Industrinë Serbe të Naftës

“Ishte zgjuarsi që kemi grumbulluar rezerva. Shpresoj që në një ose dy muaj Azerbajxhani të zgjidhë problemet. Nëse kjo nuk ndodh, për katër muajt e ardhshëm do të na duhet të mbështetemi tek rezervat tona. Megjithatë, nuk do të ketë mungesë as të gazit dhe as të naftës”, shtoi Vuçiq.

Vendimi i Azerbajxhanit vjen në një kohë kur Shtetet e Bashkuara kanë vendosur Industrinë Serbe të Naftës në listën e sanksioneve, duke këmbëngulur që kompania të mos mbetet në pronësi të Rusisë. Kjo situatë e ndërlikuar e vë Serbinë në një pozitë të vështirë, duke pasur parasysh varësinë e saj të gjatë nga gazi rus.

Në shtator të vitit 2024, Serbia kishte nënshkruar një marrëveshje me Azerbajxhanin për furnizim me gaz natyror, si pjesë e strategjisë për të diversifikuar burimet e furnizimit dhe për të ulur varësinë nga Rusia. Marrëveshja u përforcua me nënshkrimin e një partneriteti strategjik në nëntor të vitit 2023.

Ky zhvillim thekson rëndësinë e rezervave strategjike të energjisë dhe bashkëpunimit rajonal. Ndërprerja e furnizimit nga Azerbajxhani shërben si një kujtesë për nevojën e vazhdueshme për diversifikim të burimeve energjetike dhe përgatitje për kriza të papritura. /Telegrafi/