Ava Max humb gjyshin, e kujton me fjalë prekëse aktorin shqiptar Dionis Koçi: Dashurinë për skenën e kam trashëguar prej tij

Këngëtarja shqiptare me famë ndërkombëtare, Ava Max, është zgjuar mëngjesin e së martës me një lajm të hidhur.

Kjo pasi gjyshi i saj, Dionis Koçi, është ndarë nga jeta.

Lajmin e bëri të ditur vet artistja me prejardhje nga Shqipëria, përmes disa fotografive të vjetra të gjyshit të saj, të ndara me ndjekësit në Instagram.

Në mbishkrimin e tyre, ajo bëri një dedikim prekës për të gjyshin, teksa zbuloi se njohja e saj me artin nuk vjen rastësisht, pasi gjyshi i saj dikur ishte aktor i njohur i zhanrit komedi në Shqipëri.

https://www.instagram.com/p/CFa60XBl6v0/

“Sot dhe çdo ditë do të nderoj gjyshin tim të mrekullueshëm, Dionis Koçi. Sot ai u nda nga jeta. Ndërkohë që po shkruaj këtë zemra ime është e copëtuar në miliona copa, por dua të ndajë këto fotografi të tij nga Shqipëria duke bërë atë që ai donte. Ai ishte komedian dhe aktor. E di që dashurinë për skenën e kam trashëguar prej tij. Ai ishte shpirti më bujar, njeriu që gjithmonë të lumturonte, një person që do të bënte gjithçka për ty. Gjithmonë do ta kujtoj në këtë mënyrë gjyshin tim. Ti më dhe krahë për të performuar dhe u mbajte fort për të parë debutimin e albumit tim. E di që do të jesh në skenë me mua. Të dua!”, ka shkruar Ava Max në Instagram.

Përndryshe, këngëtarja emri i vërtetë i së cilës është Amanda Koçi, u rrit nga prindër shqiptar në Shtetet e Bashkuara të Amerikës dhe për fat të keq, nuk ka mundur kurrë të vizitojë atdheun e saj.

Aktualisht, ajo është duke shijuar suksesin e albumit të saj të parë debutues në tregun ndërkombëtar, “Heaven and Hell”, i cili është pritur mirë nga fansat. /Telegrafi/