Audi mund të ndërtojë një fabrikë në SHBA për shkak të tarifave të Trumpit

Prodhuesi gjerman i veturave luksoze Audi mund të ndërtojë një fabrikë në SHBA dhe të fillojë prodhimin jashtë kompanisë së saj mëmë VW, raportoi Der Spiegel.

Bëhet e ditur se marka nga grupi Volkswagen (VW) po shqyrton ndërtimin e një fabrike në jug të SHBA-së, një opsion më i shtrenjtë midis një sërë skenarësh që po shqyrtojnë.

Burime në kompani vlerësojnë kostot në deri në katër miliardë euro, sipas Der Spiegel.

Një zëdhënëse e Audi tha se kompania dëshiron të forcojë praninë e saj në SHBA, përcjell Telegrafi.

“Aktualisht po shqyrtojmë skenarë të ndryshëm. Jemi të bindur se do të marrim një vendim me detaje konkrete këtë vit, në konsultim me Grupin Volkswagen”, tha ajo.

Raportohet se Audi nuk ka fabrikën e vet në SHBA, por kompania e saj mëmë Volkswagen ka një fabrikë në Chattanooga, Tennessee, dhe po ndërton një tjetër pranë Columbia, Karolina e Jugut.

Ndryshe, SHBA këtë pranverë vendosi tarifa për veturat dhe pjesët e importuara për të tërhequr prodhimin dhe për të krijuar vende pune.

BMW, Mercedes-Benz dhe Volkswagen po negociojnë aktualisht tarifat me Uashingtonin, duke përdorur investimet dhe eksportet amerikane për të fituar kushte më të favorshme. /Telegrafi/