LAJMI I FUNDIT:

Arsimi dhe shëndetësia në grevë

Arsimi dhe shëndetësia në grevë

Këshilli Drejtues i Sindikatës së Bashkuar të Arsimit, Shkencës të Kosovës dhe Sindikata e Shëndetësisë kanë paralajmëruar për sot mbajtjen e grevës për të kundërshtuar vendimin e Gjykatës Kushtetuese për suspendimin e Ligjit për Pagat.

Greva dyorëshe në arsim është paralajmëruar të mbahet në çerdhe, në universitete dhe në të dy ndërrimet e mësimit në të gjitha shkollat e Kosovës, me kërkesën drejtuar institucioneve që të punësuarit në arsim dhe gjithë të tjerët pagën e dhjetorit ta marrin bazuar në Ligjin e pagave.

“Greva dyorëshe në çerdhe fillon nga ora 6:30  deri në orën 8:30. Greva në Universitete fillon në orën 8 deri në orën 10. Greva në shkollat e Kosovës  mbahet  në dy orët e para në të dy ndërrimet. Greva dyorëshe në arsim është alarmi i fundit dhe kushdo që punon për të zhgënjyer punëtorët e arsimit, shëndetësisë dhe të policisë së Kosovës duhet ta dinë se do të përballet me reagimet shumë më radikale sindikale”, thuhet në njoftim.

Ndërsa Federata e Sindikatave të Shëndetësisë së Kosovës ka njoftuar se sot do të mbahet grevë e përgjithshme me moton “Presim pagat me Ligjin e ri”.

Greva do të mbahet duke filluar nga ora 07:00 deri në ora 15:00, me kërkesën për implementimin e Ligjit për pagat që ka hyrë në fuqi më 1 dhjetor, por që është dërguar në Kushtetuese nga Avokati i Popullit.