Luanin “barbut” në Gjakovë, arrestohen shtatë të dyshuarit

Shtatë persona janë arrestuar pasi ishin duke luajtur lojën e fatit të ashtuquajtur “Barbut”, në një lokacion në Gjakovë.

Sipas njoftimit të Policisë së Kosovës në rajonin e Gjakovës, ky operacion është kryer të mërkurën rreth orës 19:00 në koordinim me Prokurorin e Shtetit në një lokacion ku dyshohej se ishte duke u zhvilluar dhe organizuar bixhoz i paligjshëm.

“Stacioni Policor në Gjakovë, konkretisht Njësia e Hetimeve, përmes rrugëve operative dhe hetimore kishte pranuar informatë se në rrugën “Dëshmorët e Kombit” në Gjakovë ishin duke u zhvilluar lojëra të fatit (bixhoz i paligjshëm). Me datën 09.11.2022 rreth orës 19:00, në koordinim me Prokurorin e Shtetit është realizuar kontroll në lokalin ku dyshohej se ishte duke u zhvilluar dhe organizuar bixhoz i paligjshëm. Gjatë kontrollit në atë lokacion janë hasur dhe arrestuar shtatë persona të cilët ishin duke luajtur lojën e fatit të ashtuquajtur ‘Barbut’ “, thuhet në njoftim.

Tutje sipas njoftimit, me vendim të Prokurorit të Shtetit, i dyshuari me inicialet P. P., i lindur në vitin 1963, shtetas i Republikës së Kosovës, i cili dyshohet se ishte organizatori i lojës dhe pronari i lokalit është ndaluar në mbajtje për 48 orë, ndërsa të dyshuarit e tjerë janë liruar në procedurë të rregullt. /Telegrafi/