Armëpushimi i Izraelit me Hezbollahun në krizë? Netanyahu deklaron se nuk do t’i tërheq trupat nga Libani

Benjamin Netanyahu ka njoftuar se trupat izraelite nuk do të respektojnë afatin e së dielës për t’u tërhequr nga Libani jugor, duke e futur në krizë armëpushimin me Hezbollahun.

Duke konfirmuar se Izraeli nuk do të përmbushë afatin e 26 janarit, zyra e kryeministrit tha në një deklaratë: “Procesi i tërheqjes së IDF është i kushtëzuar nga dislokimi i ushtrisë libaneze në Libanin jugor dhe zbatimi i plotë dhe efektiv i marrëveshjes”.

Ai tha se Izraeli e konsideronte armëpushimin si “ende të pazbatuar plotësisht” dhe se “procesi i tërheqjes me faza do të vazhdojë, në koordinim të plotë me Shtetet e Bashkuara”.

Ndërsa Izraeli e ka akuzuar Libanin për dështimin për të përmbushur anën e tij të marrëveshjes, Libani ka akuzuar gjithashtu Izraelin për shkelje të armëpushimit.

Bëhet e ditur se vendimi për të shtyrë tërheqjen, i marrë në një takim të kabinetit izraelit të enjten në mbrëmje, pason disa javë informimesh që sugjeronin se Izraeli synonte të qëndronte në të paktën pesë poste në Liban.

Sipas armëpushimit të rënë dakord, që i dha fund luftës me Hezbollahun në Liban, forcat izraelite supozohet të kenë përfunduar tërheqjen e tyre brenda 60 ditëve, ose deri më 26 janar, shkruan the Guardian, përcjell Telegrafi.

Raportohet se ngurrimi i Izraelit për t’u larguar nga Libani vjen në një moment të vështirë në fazën e parë të armëpushimit të brishtë njëjavor në Gaza, me një operacion izraelit në shkallë të gjerë në Bregun Perëndimor të pushtuar dhe një mungesë të thellë të qartësisë mbi politikat e Trumpit në Lindjen e Mesme.

Ndryshe, komentet e Herzog pasojnë një konferencë të mëparshme nga burime të paidentifikuara të qeverisë izraelite për transmetuesin kombëtar Channel 13, duke sugjeruar se vendi po shtyn të mbajë një prani ushtarake në Liban. /Telegrafi/