Anulohet festivali zyrtar i birrës “Beerfest Kosova”

Festivali “Beerfest Kosova” i paraparë të mbahet më 24 deri 26 qershor, detyrohet që të anulojë mbajtjen e festivalit, ngase nuk po lejohet të mbahet në lokacionin e paraparë.

Kështu kanë kanë bërë të ditur në një komunikatë për media organizatorët e këtij festivali.

“Në një takim me zyrtarët e Komunës së Prishtinës, drejtorëve të drejtorive relevante dhe Policisë së Kosovës që u mbajt pasdite të hënën, me 13 qershor, na u kumtua vendimi nga Policia e Kosovës që ky festival nuk do të lejohet të mbahet në lokacionin e përcaktuar (Parkingu, prapa Pallatit të Rinisë në Prishtinë), me arsyetimin se ky lokacion nuk i plotëson kushtet për këtë organizim”, thuhet në komunikatë.

“Kërkesat tona zyrtare për leje dhe pëlqime relevante për mbajtjen e këtij festivali në lokacionin e cekur, janë bërë në fillim të muajit mars. Deri në takimin e përbashkët që e kishim, nuk kemi pas asnjë përgjigje, përkundër insistimit tonë, duke na mbajtur kështu peng për lokacion”, thuhet më tej.

Lexo po ashtu Anulohet "Sunny Hill Festival 2022" në Prishtinë - zhvendoset në Tiranë

Sipas organizatorëve, është një vendim shumë i dëmshëm, i vonshëm dhe i pa arsyeshëm.

“Në lokacionin e njëjtë ne i kemi mbajt 4 edicionet e fundit dhe mendojmë që si lokacion është i përshtatshëm për këtë festival dhe aktivitete të tilla të ngjashme. Sido që të jetë, jemi shumë vonë për çfarëdo zgjidhje tjetër, prandaj jemi të detyruar që të anulojmë mbajtjen e festivalit në këto data, në lokacionin e paraparë”, vazhdon më tej komunikata.

Beerfest Kosova dhe MODUS, si organizatorë të festivalit thonë tutje se tani janë në kërkim të një lokacioni të ri të përshtatshëm dhe për përcaktim të datave të reja.