Ancelotti: Bayernit nuk i pëlqenin metodat e mia

Carlo Ancelotti e ka treguar arsyen pse Bayern Munichu e shkarkoi nga posti i trajnerit, ndërkohë që i ka dhënë disa këshilla trajnerit të ri të Milanit, Gennaro Gattuso.

Strategu italian ishte shkarkuar përkundër se e fitoi titullin e Bundesligas në sezonin e kaluar, ndërsa ka pasur thashetheme të ndryshme rreth arsyes së largimit të tij.

“Shumëçka është thënë nga lojtarët, presidenti i Bayernit, media. Nuk dua ta rikujtoj atë që ka ndodhur”.

“Ishte një mosmarrëveshje rreth metodologjisë së punës. E kam ndërtuar metodën time të punës për shumë vite dhe nuk do ta ndërroj”.

Lexo po ashtu Ancelotti: Më ka kontaktuar Italia, asnjëherë Milani

“Lojtarët zhvillojnë 60 ndeshje në vit dhe metoda ime është e bazuar në cilësi dhe jo në sasi.

“Në vend se të qëndroj në fushë për një orë e gjysmë duke bërë vrapime të ngadalshme, preferoj të qëndroj aty për një orë dhe të përqendrohem në vrapime të shpejta, duke punuar me top dhe duke i përsëritur situatat e ndeshjes”, ka deklaruar Ancelotti për La Domenica Sportiva.

Ish-trajneri i Milanit është pyetur nëse ka ndonjë këshillë për trajnerin aktual të Rossonerëve, ish-lojtarin e tij, Gennaro Gattuso.

“Do t’i them Gattusos se është më mirë të dështosh duke i shfrytëzuar idetë tua, sesa të mbytesh me idetë e të tjerëve”, ka thënë Ancelotti. /Telegrafi/