Akademi me rastin e ditës së pavarësisë së ShBA (Video)

Akademia Shqiptare Amerikane e Shkencave dhe Arteve, përmes një akademie solemne, e ka shënuar 4 korrikun, ditën e pavarësisë së Shteteve të Bashkuara të Amerikës, transmeton Telegrafi Maqedoni.

Pjesëmarrësit në këtë konferencë, janë shprehur se populli amerikan ka ndihmuar çdoherë shqiptarët në momente të rëndësishme të historisë.

“U jemi mirënjohës për mbështetjen e pa rezervë të lirive dhe të drejtave kombëtare të shqiptarëve të Maqedonisë, sidomos në përpjekje për sigurimin e të drejtës për arsim të lartë në gjuhën amtare me themelimin e UT si dhe për kontributin e çmuar në të mirë të kombit tonë dhe në ditët e sotme në përpjekjet tona për integrime euroatlantike për ruajtjen e vlerave perëndimore.”, ka deklaruar Abdulla Mehmeti, Kryetar i AShAShA.

“Kthesa e madhe historike ndodhi pas luftës së Kosovës, gjegjësisht në vitin 1999, ku aleati jonë, ShBA me NATO dhe me unionin evropian intervenuan përkrah popullit shqiptar dhe ai intervenim rezultoi me anëtarësimin e Shqipërisë në NATO, me krijimin e shtetit të Kosovës dhe me avancimin e çështjes shqiptare në Maqedoni.”, është shprehur Skender Asani, drejtor i ITKSh.

Nga kjo akademi solemne është dërguar porosi që të ruhet miqësia mes popujve në të mirë të paqes dhe përparimit si dhe në të mirë të vlerave demokratike./Telegrafi/