Kryetari i Komunës së Prishtinës, Shpend Ahmeti, ka reaguar pas marrjes së vaksinave anti-COVID nga kryeministri Albin Kurti dhe kryetari i Gjilanit, Lutfi Haziri.

Ahmeti ka kundërshtuar këtë veprim të tyre duke e arsyetuar me numrin e pakët të vaksinave që kanë ardhur në Kosovë.

“Me vetëm 24,000 vaksina të siguruara, nuk ka nevojë për senzibilizim nga udhëheqësit politik për marrjen e vaksinës. Një politikan edhe mund ta bëjë gabimin e marrjes para atyre që kanë nevojë, por kur rreshtohen politikanët e shëndoshë e të rinj, kjo veç është banalitet. Ky status nuk është status as kundër ndonjë politikani e as kundër ndonjë partie. Si kolegë po ju them, 24,000 vaksina nuk mjaftojnë as për punëtorët shëndetësor e të moshuarit”.

I pari i Prishtinës thotë se çdo vaksinë që merret nga politikanët e rinj e të shëndoshë është një vaksinë më pak për dikë në nevojë.

“Një vaksinë që ju e merrni është një vaksinë më pak për dikë në nevojë që mund të rrezikojë jetën. Nuk po them që duheni me u sëmu me covid, por sakrificë në këtë rast është me hjek dorë prej vaksinës edhe në qoftë se ju ofrohet. Së shpejti do të ketë mjaft. Mosni ju lutem!”, ka shkruar më tej Ahmeti./Telegrafi/