Me afrimin e zgjedhjeve parlamentare, Kremlini nis goditjet ndaj rivalëve të Vladimir Putinit

Në një kohë kur sondazhet publike po tregojnë një rënie të mbështetjes për partitë pro presidentit Vladimir Putin, përpara zgjedhjeve të planifikuara parlamentare të vjeshtës, Kremlini ka nisur të zbatojë një strategji të re fushate: “pastrimin e terrenit” nga sfiduesit e mundshëm.

Pas arrestimit dhe dënimit të udhëheqësit të opozitës Aleksei Navalny në fillim të këtij viti, Kremlini ka rritur presionin ndaj kundërshtarëve të tjerë të mundshëm, realë apo të perceptuar, përpara zgjedhjeve parlamentare të vjeshtës.

Një gjykatë e etiketoi në qershor si organizatë “ekstremiste”, Fondacionin Anti-Korrupsion të Navalnyt gjatë një procesi gjyqësor me dyer të mbyllura, një vendim që nxiti shpërbërjen e organizatës dhe që praktikisht ndalon anëtarët e saj të jenë pjesë e jetës politike në të ardhmen.

Ndërkohë, politikanë të tjerë kryesorë të opozitës, si dhe anëtarë të familjeve të tyre, papritur e gjetën veten përballë hetimesh penale. Një lëvizje e ndërmarrë për t’i detyruar ata që t’i japin fund fushatave zgjedhore e të largohen nga vendi, raportojnë mediet ndërkombëtare.

“Sigurisht, arsyeja kryesore janë zgjedhjet parlamentare. Kremlini dëshiron të bëjë gjithçka që është e mundur vetëm për të hequr qafe kundërshtarët e fortë të tij”, thotë Dmitry Gudkov, politikan i opozitës në mërgim.

Pas këtyre masave thonë kritikët, qëndron popullariteti në rënie, para zgjedhjeve parlamentare të shtatorit, i partisë qeverisëse të Kremlinit, Rusia e Bashkuar.

“Rregullat kanë ndryshuar plotësisht që nga viti 2019, kështu që aktualisht është pothuajse e pamundur që një kandidat i pavarur, ose një kandidat serioz i opozitës, jo vetëm të zgjidhet, por edhe të regjistrohet”, thotë Boris Kagarlitsky, i Shkollës së Shkencave Sociale dhe Ekonomike në Moskë.

Forcat e linjës së ashpër brenda Kremlinit duken të etur për të shmangur përsëritjen e gabimeve të zgjedhjeve të kaluara, kur shkeljet ligjore gjatë ditës së votimit çuan në një rritje të protestave në rrugë.

Ata që janë futur në një listë qeveritare të ashtuquajtur lista e të padëshiruarve, thonë se është më lehtë për autoritetet t’i burgosin kandidatët e ardhshëm me çdo mjet të nevojshëm.

“Është më e thjeshtë ta heqësh diçka nga rrënjët sesa ta lejosh që situata të zhvillohet, sepse është e paqartë se çfarë do të ndodhë më pas dhe si do të reagojë shoqëria. Pse të rrezikosh kur thjesht mund të fusësh njerëz në burg?!”, thotë ajo.

Vëzhguesit thonë se është provë drejt rritjes se autoritarizmit, ndërsa presidenti Putin hyn në dekadën e tij të tretë në pushtet mbështetur nga reforma të diskutueshme kushtetuese që mund ta mbajnë atë në pushtet deri në vitin 2036.

“Regjimet autoritare funksionojnë në bazë të një parimi, që atë që kontrollon sot, duhet ta kesh edhe më shumë nën kontroll në të ardhmen”, thotë analist politik Kiril Rogov.

Në takimin e tij me presidentin amerikan Joe Biden në Gjenevë, udhëheqësi rus Vladimir Putin hodhi poshtë sugjerimet për një goditje të opozitës, duke thënë se ligji synonte ata që mbështeten hapur nga Uashingtoni.

“Këto janë organizata dhe njerëz që reklarojmë politikën e Shteteve të Bashkuara mbi Rusinë. Si duhet t’i trajtojmë ne ata?!”, tha Putin.

Biden thotë se administrata e tij do të vazhdojë t’i bëjë presion Kremlinit mbi çështje të të drejtave të njeriut në vend. Por kjo nuk e lehtëson barrën për kandidatët e mundshëm, që janë penguar të hyjnë në garën zgjedhore, apo për mbështetësit e tyre, të cilëve u ngushton çdo ditë mundësitë për të zgjedhur në fletën e votimit. /Telegrafi/