Aeroplani i parë evakuues gjerman u largua nga Kabuli me vetëm shtatë persona në bord – tregohet se pse ndodhi diçka e tillë

Një aeroplan transporti ushtarak gjerman i cili u largua nga Kabuli të hënën vonë duke transportuar kontigjentin e parë të evakuuarve ishte në gjendje të merrte vetëm shtatë persona për jashtë kryeqytetit afgan, tha të martën një zëdhënës i Ministrisë së Jashtme.

Sipas mediave të huaja, përcjell Telegrafi, bëhet fjalë për një Airbus A400M që është projektuar zyrtarisht për 114 pasagjerë, megjithëse kuptohet se deri në 150 persona mund të transportohen në të gjatë operacionit të evakuimit.

Dhe një zëdhënës i Ministrisë së Jashtme fajësoi “rrethanat kaotike në aeroport dhe shkëmbimet e rregullta të zjarrit në pikën e hyrjes”.

Zëdhënësi shtoi se “nuk ishte e garantuar mbrëmë që shtetasve të tjerë gjermanë dhe personave të tjerë që do të evakuoheshin do t’u lejohej hyrja në aeroport fare pa mbrojtjen e Bundeswehr”.

Lexo po ashtu Bëhen të ditura detaje rreth ngjarjes në të cilën qindra afganë po ndiqnin me vrap aeroplanin amerikan

Avioni gjithashtu duhej të linte aeroportin pas një periudhe shumë të shkurtër dhe nuk kishte qenë e sigurt të sillnin të evakuuarit në aeroport para mbërritjes së avionit.

Ndryshe, thuhet më tej, ushtria gjermane kishte qenë në gjendje të sillte parashutistët nga divizioni i saj i dislokimit të shpejtë – të cilët janë trajnuar posaçërisht për operacionet e evakuimit – në Kabul me këtë avion të parë.

“Me mbështetjen e forcave të Bundeswehr që tani mbërrijnë në Kabul, ne po punojmë nën presion të lartë për ta bërë të mundur këtë për grupet e para të evakuimit gjatë orëve të ardhshme”, tha zëdhënësi.

Lexo po ashtu Pamje të transmetuara nga disa media botërore: 'Pasagjerët' që bien në tokë, pas ngritjes së aeroplanit - derisa po përpiqeshin të iknin nga Afganistani

Ministrja e Mbrojtjes, Annegret Kramp-Karrenbauer, kishte thënë në televizionin gjerman të martën në mëngjes se fluturimi ishte kryer në kushte jashtëzakonisht të vështira.

“Ne kemi një situatë shumë konfuze, të rrezikshme, komplekse në aeroport, veçanërisht për shkak të turmave”, ka thënë politikania konservatore. /Telegrafi/