Aeroplanët britanikë ‘ndjekin’ atë të Kenya Airways – e detyrojnë të aterojë në aeroportin Stansted të Londrës për shkak të ‘kërcënimit të mundshëm të sigurisë’

Aeroplanët e Forcës Ajrore Britanike kanë ndjekur një fluturim të Kenya Airways që u devijua në aeroportin Stansted pas një “kërcënimi të mundshëm të sigurisë” në bord.

Sipas mediave të huaja, përcjell Telegrafi, aeroplani Boeing 787 i Kenya Airways u devijua në Stansted të Londrës pak para orës 15:45.

Ai duhej të ulej në aeroportin Heathrow nga Nairobi.

Policia e Essex u thirr në aeroport dhe aeroplani u ul i sigurt.

Një zëdhënës i forcës tha: “Aktualisht jemi duke ndjekur një incident në aeroportin Stansted”.

“Një fluturim që udhëtonte nga Nairobi në Heathrow u devijua në Stansted këtë pasdite”.

Dhe pamjet në mediat sociale treguan aeroplanin në pistë në Stansted, si dhe një numër automjetesh të reagimit emergjent.

Në një deklaratë, Kenya Airways tha: “Selia mori një alarm për një kërcënim të mundshëm të sigurisë në bordin e KQ100 që operonte nga Nairobi në Heathrow”.

“Menaxhmenti i KQ në bashkëpunim me autoritetet e sigurisë të qeverisë së Kenias dhe Mbretërisë së Bashkuar kryen një vlerësim të plotë të rrezikut të kërcënimit”.

“Ekuipazhi në bord u informua dhe u morën të gjitha masat paraprake të sigurisë për të garantuar sigurinë e ekuipazhit dhe pasagjerëve tanë në bord”.

“Aeroplani u ul i sigurt në aeroportin Stansted, Londër për verifikimin e sigurisë nga personeli i sigurisë së qeverisë së Mbretërisë së Bashkuar”. /Telegrafi/