Analiza e ekspertit amerikan për ndryshimet e Trumpit: Serbia do të bëjë përpjekje për territore në BeH dhe Kosovë

Profesori i Universitetit Johns Hopkins dhe njohësi i çështjeve të Ballkanit, Daniel Serwer, ka ngritur shqetësime mbi ndryshimet që administrata Trump po planifikon në politikën e jashtme, veçanërisht në raport me Ukrainën dhe Evropën.

Pete Hegseth, Sekretar amerikan i Mbrojtjes, njoftoi të mërkurën një ndryshim të madh në politikën e SHBA-së ndaj Ukrainës, duke propozuar:

Përfundimin e mbështetjes së Uashingtonit për anëtarësimin e Ukrainës në NATO;

Braktisjen e objektivit të Kievit për të rimarrë territoret e saj sovrane;

Reduktimin drastik të ndihmës amerikane për Ukrainën;

Përjashtimin e trupave amerikane nga çdo mision paqeruajtës pas luftës;

Kërkesën që Evropa të marrë përsipër çdo mision të tillë pa garancinë e Nenit 5 të NATO-s.

Serwer vlerëson se ky ndryshim do t’i jepte Rusisë gjithçka që kërkon, përveç kontrollit të drejtpërdrejtë dhe të menjëhershëm mbi qeverinë në Kiev.

Sipas tij, kjo nuk është “paqe përmes forcës”, siç pretendon Hegseth, por një dorëzim ndaj interesave ruse.

Ai paralajmëron se një Ukrainë e braktisur nga SHBA mund të detyrohet të kërkojë armë bërthamore për mbijetesë, një skenar që Rusia nuk do ta lejonte.

Për më tepër, sipas tij, një tërheqje e tillë do të rrezikonte stabilitetin në Ballkan, duke inkurajuar Serbinë të ndërmarrë hapa për të zgjeruar kontrollin e saj mbi territore në Bosnjë dhe Kosovë.

Gjithashtu, një politikë e tillë do të dërgonte një sinjal të rrezikshëm për Kinën, duke e bërë të qartë se SHBA nuk do të ishte e gatshme të mbrojë Tajvanin.

Serwer argumenton se administrata Biden ka ndjekur një politikë të balancuar, duke i shkaktuar humbje të konsiderueshme Rusisë pa provokuar përdorimin e armëve bërthamore.

Megjithatë, ai pohon se kjo nuk ka qenë e mjaftueshme për një fitore të Ukrainës.

“E vetmja mënyrë për ta siguruar atë është përmes një epërsie teknologjike dhe mbështetjeje të pakushtëzuar nga Perëndimi”.

Një fitore e Ukrainës, sipas Serwer, do të forconte Perëndimin, do të dobësonte përpjekjet ruse për ekspansion dhe do të krijonte një Ukrainë të stabilizuar ekonomikisht, e cila mund të bëhej një partner i rëndësishëm tregtar për SHBA dhe Evropën./Telegrafi/