Trump përsërit kërcënimin për të rimarrë Kanalin e Panamasë “ose do të ndodhë diçka shumë e fuqishme”

Presidenti Donald Trump përsëriti zotimin e tij për të “marrë përsëri” Kanalin e Panamasë të dielën, duke paralajmëruar për veprim “të fuqishëm” të SHBA-së në një mosmarrëveshje diplomatike në përshkallëzim me vendin e Amerikës Qendrore mbi praninë e Kinës rreth rrugës jetike ujore.

“Kina po drejton Kanalin e Panamasë që nuk iu dha Kinës, që iu dha Panamasë marrëzisht, por ata e shkelën marrëveshjen dhe ne do ta kthejmë atë, ose diçka shumë e fuqishme do të ndodhë”, u tha Trump gazetarëve, shkruajnë mediat e huaja, përcjell Telegrafi.

Disa orë më parë, “trazirat diplomatike” të shkaktuara nga dëshira e përsëritur dhe e deklaruar publikisht e Trump që SHBA të rimarrë kontrollin e kanalit u dukën se “u lehtësuan” pasi Sekretari i Shtetit, Marco Rubio, bëri udhëtimin e tij të parë jashtë shtetit si kryediplomat amerikan, duke u takuar me presidentin e Panamasë, Raul Mulino.

Megjithëse Mulino i tha Rubios se sovraniteti i Panamasë mbi kanalin nuk ishte për diskutim, ai tha gjithashtu se kishte adresuar shqetësimet e Uashingtonit mbi ndikimin e supozuar të Pekinit rreth rrugës ujore.

Mulino u tha gazetarëve se Panamaja do të kërkojë të punojë me SHBA-në për investime të reja, duke përfshirë projektet e infrastrukturës.

“Unë mendoj se kjo vizitë hap derën për të ndërtuar marrëdhënie të reja … dhe të përpiqet të rrisë sa më shumë investimet e SHBA në Panama”, ka shtuar ai.

Gjatë takimit, Rubio i tha presidentit dhe ministrit të Jashtëm të Panamasë, Javier Martínez-Acha se shqetësimet mbi “kontrollin” e Kinës të Kanalit të Panamasë mund të nënkuptojnë se SHBA duhet “të marrë masat e nevojshme për të mbrojtur të drejtat e saj” sipas një traktati të gjatë mbi neutralitetin dhe funksionimin e kanalit.

Kanali iu kthye Panamasë sipas një traktati të vitit 1977, i cili lejon SHBA-në të ndërhyjë ushtarakisht nëse operacionet e rrugës ujore ndërpriten nga ndonjë konflikt i brendshëm ose nga një fuqi e huaj.

Sot, më shumë ngarkesa se kurrë kalojnë nëpër kanal se sa gjatë viteve të kontrollit të SHBA-së.

Por Mulino tha të dielën se nuk mendon se ekziston rrezik real që SHBA-të të përdorin forcën ushtarake për të rimarrë kanalin. /Telegrafi/