Rasti “Brezovica”, përfundon aksioni policor në disa komuna të Kosovës

Aksioni policor i cili u zhvillua të enjten në Prishtinë, Ferizaj, Vushtrri dhe Lipjan e që ndërlidhet me rastin “Brezovica”, tashmë ka përfunduar.

Kështu bëri të ditur në një prononcim për Telegrafin prokurori i Prokurorisë Themelore në Ferizaj, Rasim Maloku.

“Ka përfunduar aksioni”, ka thënë shkurt Maloku duke mos dhënë detaje shtesë.

Ndryshe, Prokuroria Themelore në Ferizaj ka dhënë detaje rreth aksionit policor i cili po zhvillohet në disa komuna e që ndërlidhet me rastin “Brezovica”.

Lexo po ashtu Rasti “Brezovica” – policia me aksion në disa komuna

“Prokuroria Themelore në Ferizaj, njofton opinionin publik se në bashkëpunim me Policinë e Kosovës, Drejtorinë për Hetimin e Krimeve të Rënda (DHKR) në Prishtinë, Administratën Tatimore të Kosovës (ATK) dhe Doganën e Kosovës, në bazë të urdhëresës së lëshuar nga Gjykata Themelore në Ferizaj për lëshimin e urdhëresës për kontroll dhe sekuestrim te përkohshëm të shtëpive, lokaleve përcjellëse dhe auto salloneve, sot, është duke e realizuar një aksion i cili ka rrjedh në kuadër të hetimeve lidhur me rastin “Brezovica””, thuhet në njoftim.

Lexo po ashtu Detaje nga aksioni policor në disa komuna – bastisje në autosallone, shtëpi e lokale

Gjatë këtij aksioni janë kontrolluar dhe bastisur disa autosallone, shtëpi dhe lokale përcjellëse në lokacione të ndryshme, konkretisht në qytetin e Prishtinës, Ferizajt, Vushtrisë dhe Lipjanit, për shkak të dyshimit të veprave penale “Fajdeja” nga neni 331 par.3 lidhur me par. 1 të Kodit Penal të Republikës së Kosovës, “Shmangia nga tatimi” nga neni 307 par.1 lidhur me par 3 të KPRK-së dhe “Detyrimi” nga neni 328 par.2 të KPRK-së.

Prokuroria Themelore në Ferizaj, do të i’u informoj në vazhdimësi lidhur me këtë aksion. /Telegrafi/