Mësohet arsyeja e shtrirjes në spital të Luke Perryt, aktori ka pësuar goditje në tru

Luke Perry ditë më parë është shtrirë në spital, ndërsa është mësuar se arsyeja e hospitalizimit ka qenë një goditje në tru që ka pësuar aktori.

Edhe pse një anëtar i familjes së tij kishte thënë se 52-vjeçari ndodhet në koma, zëdhënësi i tij ka thënë se kjo nuk është e vërtetë, porse atij i janë dhënë qetësues.

Siç transmeton TMZ, goditja në tru ka qenë “e madhe”, ndërsa kur shërbimet emergjente kishin arritur në shtëpinë e tij, ai ka qenë i vetëdijshëm, por në ndërkohë gjendja i është përkeqësuar dhe është dërguar me urgjencë në spital.

Yje të shumta hollivudiane, miq dhe ish-bashkaktorë kanë shprehur mbështetjen e tyre për Perryn duke uruar që ai të shërohet sa më shpejtë.

---

Goditja në tru (insulti cerebral) është një urgjencë mjekësore. Goditja në tru ndodh kur ndalon qarkullimi i gjakut në tru. Brenda pak minutash, qelizat trunore nisin të vdesin. Janë dy lloje goditjesh në tru.

Më e shpeshta quhet iskemia trunore kur ndodh bllokimi i një ene të gjakut për shkak të mbylljes nga ndonjë tromb dhe kështu pamundësohet qarkullimi i gjakut në tru.

Ndërsa lloji tjetër quhet goditja hemorragjike që shkaktohet kur një enë e gjakut dëmtohet dhe gjaku rrjedh brenda trurit.

‘Mini-goditjet në tru’ ose sulmet kalimtare iskemike (TIA) ndodhin kur furnizimi me gjak në tru është i ndërprerë përkohësisht.

---

Në ndërkohë, për koincidencë, sëmundja e tij ka ndodhur në ditën kur Fox kishte njoftuar se do të nisin xhirimet për ribërjen e hit serialit të viteve të nëntëdhjeta, “Beverly Hills, 90210”.

Ishte pikërisht ky serial, i cili e bëri të famshëm Perryn në rolin e Dylan McKay, ndërsa së fundmi ka qenë pjesë e serialit “Riverdale” (që nga viti 2017).

Në ndërkohë, bashkaktorët e dikurshëm – Jennie Garth, Ian Ziering, Jason Priestly, Brian Austin Green, Tori Spelling e Gabrielle Carteris – do të jenë pjesë e ribërjes së Beverly Hills, 90210″, ndërsa Luke Perry akoma nuk ka nënshkruar për t’iu bashkuar projektit. /Telegrafi/