34 fermerë ferizajas, bëhen me lopë nga Irlanda

Komuna e Ferizajt në bashkëpunim me shoqatën ‘Mëshqerra”, të martën ka bërë shpërndarjen e 34 krerëve lopë qumështore për fermerët ferizajas.

Selvete Bajrami, është njëra ndër përfitueset e para nga ky subvencion që po bënë komuna e Ferizajt. Ajo tha se ndjehet me fat që ka qenë njëra ndër përfitueset.

“Unë më këtë veprimtari merrem që dy vite e gjysmë. Kjo është një ndihmë e madhe për neve sepse po punojmë me këtë veprimtari. Unë qumështin e shes dhe ka leverdi prej kësaj veprimtarie”, ka thënë Bajrami përderisa ka theksuar se në të ardhmen dëshiron të rrisë veprimtarin e saj.

Nga ana tjetër drejtori i Bujqësisë në Ferizaj, Xhemajl Reqica, u shpreh se komuna e Ferizajt gjatë këtij viti ka qenë e përkushtuar që të ndihmojë të gjithë fermerët ferizajas me lopë qumështore.

“Komuna e Ferizajt e ka përmbyll këtë projekt me 174 krerë lopë për këtë vit, që do të thotë 197 mijë euro janë subvencionet vetëm për lopë që i kemi dhënë si drejtori për këtë vit. Ndërkaq përmes kë tij projekti përfitojnë 34 përfituese. Përzgjedhja është bërë ne secilin fshat të Ferizaj, në mënyrë që asnjë të mos diskriminohet”, ka thënë Reqica.

Ndërkaq përfaqësuesja e organizatës joqeveritare “Mëshqerra” Florentina Kida Gërguri, tha se lopët janë donacion nga Irlanda për fermerët kosovarë. U bë e ditur se veç këtyre 34 lopëve vitin tjetër kur ato të shtohen fermerët përfitues e kanë për detyrë që viçat t’ua japin fermerëve të tjerë.

Bashkëpunimi i tillë u vlerësua si shumë i dobishëm për fermerët e Ferizajt. E gjithë vlera e participimit të komunës në këtë projekt është rreth 54 mijë euro. /Telegrafi/