Zyrtari i lartë amerikan sot takohet me Vuçiqin, temë Kosova

Presidenti i Serbisë, Aleksandar Vuçiq, do të takohet sot me zyrtarin e lartë të Departamentit të Shtetit, Matthew Palmer.

Sipas mediave serbe, përcjell Telegrafi, temat e bisedimeve nuk janë shpallur nga kabineti i presidentit të Serbisë, por nuk ka dyshim se njëra prej tyre do të jetë zgjidhja e çështjes së Kosovës.

Ndryshe, siç kujtojnë mediat serbe, Zëvendës Ndihmës Sekretari i Shtetit më parë u takua me Vuçiqin në tetor të vitit të kaluar, kur ai tha se SHBA-ja e mbështet dialogun midis Beogradit dhe Prishtinës në mënyrë që të arrihet një marrëveshje që do të çojë në normalizimin e plotë të marrëdhënieve.

Zyrtari i Departamentit të Shtetit, atëherë i bëri thirrje Beogradit dhe Prishtinës që të shfrytëzojnë mundësinë historike dhe për të arritur një marrëveshje që do të jenë të qëndrueshme,… duke deklaruar se është koha për kompromis dhe fleksibilitet.

Takimi mbahet më shumë se dy javë para takimit në Paris ku temë do të jetë Kosova.

Po sipas mediave serbe, zyrtari i Këshillit të Sigurisë Kombëtare të SHBA-së, John Erath tha ndërkohë se Shtetet e Bashkuara janë të gatshme të marrin pjesë në konferencën e ardhshme në Paris, por kjo ende nuk është përcaktuar. /Telegrafi/