Zyrtari i regjimit sirian: Turqia në zonat e pushtuara po vepron si Izraeli

Sot në Soçi të Rusisë është mbajtur takimi i dhjetë me radhë në mes të “Shteteve garantuese në bisedimet e paqes për Sirinë” që janë Rusia, Turqia dhe Irani.

Në deklaratën që është publikuar në media thuhet se është rënë dakord për mbrojtjen e integritetit territorial të Sirisë, garantimin e kushteve për kthimin e sirianëve në shtëpitë e tyre dhe lirimin e një numri të vogël të burgosurish.

Në disa nga pikat tjera që palët janë pajtuar janë edhe vazhdimi i luftës kundër terrorizmit, eliminimi i elementeve të DAESH/ISIL, luftimi i grupeve të lidhura me Al Kaidën dhe personave që janë të lidhur me terrorizmin që gjenden edhe në listën e Këshillit të Sigurimit të OKB-së.

Gjithashtu në deklaratën e publikuar në media thuhet se shtetet garantuese kanë theksuar nevojën për krijimin e kushteve për kthimin e refugjatëve ne shtëpitë e tyre.

Bashar al-Jaafari, i cili përfaqëson regjimin e Sirisë në OKB, ka thënë se nuk do të ketë kompromis sa i përket shtrirjes së kontrollit nga ushtria në të gjithë Sirinë, përcjell Telegrafi.

Ai ka sulmuar ashpër Turqinë, e cila mbështet grupet opozitare në konfliktin sirian, duke e quajtur si pushtuese të territoreve siriane.

“Autoritetet turke jo vetëm që kanë kryer pushtime në Siri, por edhe kanë bërë zëvendësimin e identitetit sirian me atë turk, duke përsëritur atë që ka bërë Izraeli në Lartësitë e Golanit”, deklaroi ai.

Kujtojmë, Rusia dhe Irani në konfliktin e Sirisë mbështesin regjimin sirian, ndërsa Turqia mbështet grupet opozitare siriane që luftojnë regjimin e Asadit. /Telegrafi/