Zjarri në lagjen Marigona në Prishtinë, nga Drejtoria për Siguri dhe Emergjenca thonë se ishte i qëllimshëm

Të dielën mbrëma Komuna e Prishtinës ka njoftuar se është djegur një pjesë e tokave afër lagjes Marigona, në Prishtinë.

Me të marrë vesh lajmin, Drejtoria për Siguri dhe Emergjenca, ka dalë në vendin e ngjarjes dhe e ka lokalizuar zjarrin, transmeton Telegrafi.

Ndërsa, në një deklaratë për Telegrafin, drejtori i Drejtorisë për Siguri dhe Emergjenca, Lulzim Fushtica tha se ky zjarr nuk ishte si pasojë e temperaturave të larta, por dikush qëllimisht e ndezi atë.

“Informatën e kemi marrë të dielën, në orën 21:00 nga disa qytetarë që po digjet një pjesë e livadheve e fushave që janë prapa lagjes Marigona.  Nuk është zjarr që është ndezë për shkak të temperaturave apo për shkak të pakujdesisë, është zjarr i qëllimshëm i qytetarëve të cilët i djegin hamulloret” tha ai.

Sipas drejtorit për tu shuar zjarri u dashtë vetëm një orë dhe nuk ka ndonjë rrezik. Por, raste të tilla të zjarrit mund të ketë prapë.

“Zjarri është shua mbrëmë pas orës 22:30, është lokalizu dhe është fikë zjarri. Nuk paraqet asnjë rrezik. Por, nuk mund të garantojmë që nuk do të ketë prapë ndezje të zjarrit në atë lokacion apo lokacione të tjera.  Për shkak se qytetarët e kanë bërë një lloj tradite që mbas sezonit të korrje-shirjeve të i djegin hamulloret”, tha ai.

Drejtori thotë se të gjithë ata që tentojnë të ndezin zjarre, do të përballën me ligjin.

“Ne kemi bërë thirrje të vazhdueshme që mos të digjen hamulloret, kemi pas edhe takimin e Këshillit Komunal për Siguri, ku bashkërisht me policinë, me zjarrfikësit, me qytetarët kemi apelua që kjo mos të ndodhë. Po prapë se prapë kemi qytetarë të pandërgjegjshëm që po vazhdojnë të bëjnë të njëjtën por duhet të kenë të qartë të gjithë qytetarët që kjo paraqet vepër penale dhe shkelje të ligjit”, thotë ai.

Ndryshe, Telegrafi vazhdimisht ka postuar lajme në mënyrë që të parandalohet ndezja e zjarreve të tilla sepse paraqet shkelje ligjore dhe në të njëjtën kohë rrezikon edhe sigurinë publike. /Telegrafi/