Zjarri mbetet jashtë kontrollit, të tjerë njerëz u evakuuan nga shtëpitë e tyre në ishullin spanjoll të Tenerife

Më shumë njerëz u evakuuan nga shtëpitë e tyre në ishullin spanjoll të Tenerife të shtunën në mëngjes, pasi një zjarr që shpërtheu në veri të ishullit mbeti jashtë kontrollit, por flakët deri më tani kanë shmangur zonat kryesore turistike.

Sipas mediave të huaja, përcjell Telegrafi, flakët e ashpra “ndezën” qiellin e natës vonë gjatë natës nga e premtja në të shtunë.

Zjarri shpërtheu të mërkurën në një park kombëtar malor rreth vullkanit Mount Teide – maja më e lartë e Spanjës – mes motit të nxehtë dhe të thatë.

Udhëheqësi rajonal Fernando Clavijo, duke folur vonë të premten, tha se rreth 5,000 hektarë ishin prekur me një perimetër prej 50 kilometrash – dhe 7,000 njerëz u evakuuan ose u mbyllën në shtëpitë e tyre.

The wildfire ravaging the Spanish island of Tenerife, burning through more than 2,600 hectares of land, is the "most complex" blaze to hit the Canary Islands in decades. pic.twitter.com/XpKjaeel7h

— DW News (@dwnews) August 19, 2023

Më herët gjatë javës, Clavijo e quajti zjarrin më kompleksin me të cilin janë përballur Ishujt Kanarie në 40 vjet, për shkak të një kombinimi të motit të nxehtë, të thatë dhe me erë, si dhe terrenit të vështirë.

“Moti ka ndryshuar dhe na është dashur të evakuojmë qytetet në veri të Tenerife-s, konkretisht pesë zona”, u tha gazetarëve të shtunën Manuel Miranda, këshilltar rajonal për Politikat Territoriale, Kohezionin Territorial dhe Ujërat.

Miranda tha se temperaturat ishin rritur gjatë natës, ndërsa lagështia kishte rënë dhe era ishte më me intensitet.

Ai tha se më shumë evakuime ishin të nevojshme për shkak të “rrezikut dhe afërsisë së zjarrit”, duke shtuar se deri më tani autoritetet “kanë shmangur çdo humbje njerëzore… dhe ky është objektivi ynë kryesor”.

Siç bëhet e ditur më tej, zonat e njohura turistike të ishullit deri më tani kanë mbetur të paprekura dhe dy aeroportet e tij kanë funksionuar normalisht.

Ndryshe, vapa përvëluese dhe moti i thatë këtë verë kanë kontribuar në zjarret jashtëzakonisht të rënda në Evropë dhe Kanada.

Zjarret në ishullin Maui të Hawait në fillim të këtij muaji vranë më shumë se 110 njerëz dhe shkatërruan qytetin turistik historik të Lahaina.

Shkencëtarët thonë se ndryshimi i klimës ka çuar në ngjarje më të shpeshta dhe më të fuqishme të motit ekstrem. /Telegrafi/