“Zgjoi” jashtë nominimeve të Oscars 2022, vjen reagimi i Yllka Gashit: Jam e bindur që në vitet në vijim një film kosovar do të nominohet

Të martën është bërë e ditur lista e plotë e nominimeve për çmimet vjetore të Akademisë, “Oscars 2022”.

Shqiptarët me shumë entuziazëm pritën njoftimin për të nominuarit në kategorinë “Filmi më i mirë ndërkombëtar”, në listën e ngushtë të të cilëve ndodhej filmi kosovar “Zgjoi”.

Mirëpo fati nuk u gjend në anën e filmit të shumë çmimeve ndërkombëtare, pasi ai nuk arriti të nominohet në pesë filmat që konkurronin në këtë kategori.

Lexo po ashtu Filmit “Zgjoi” i ndërpritet ëndrra për t’u nominuar në Oscars

Me gjithë zhgënjimin e përjetuar, aktorja e cila luan rolin kryesor në film, Yllka Gashi, bëri një postim në rrjetin social Facebook, duke i falënderuar të gjithë ata që e mbështetën filmin “Zgjoi” gjatë gjithë rrugëtimit të tij.

Lexo po ashtu Lista e plotë e nominimeve për “Oscars 2022”

Ky është statusi i plotë i aktores (pa ndërhyrje):

“‘Zgjoi’ që e punuam me shumë pasion e përkushtim, na hapi dyer e na e mundësoi jo vetëm të kemi shpërthim ndërkombëtar në karrierat tona, por edhe ta promovojmë Kosovën e suksesin e grave të Kosovës!
“Zgjoi” na solli gëzim e na bëri krenarë të gjithëve dhe shkroi histori te re për kinematografinë tonë!
Ishte dhe mbetet rrugëtim i bukur e i paharruar, për të cilin jam shumë falenderuese!
Falemnderit shumë që u gëzuat për ne e për dashurinë e përkrahjen e jashtëzakonshme që na e keni dhënë tash e një vit!
Jam e bindur që në vitet në vijim filmi kosovar do të bëjë histori duke u nominuar e fituar në edicionet e ardhshme të Akademisë.
Kosova ka shumë talent e rrëfime autentike të cilat duhet t’i tregojmë!
Edhe njëherë falemnderit nga zemra”, ka shkruar Gashi.

Përndryshe në kategorinë “Filmi më i mirë ndërkombëtar” janë nominuar filmat: “Drive My Car”, “Flee”, “The Hand of God”, “Lunana: A Yak in the Classroom” dhe “The Worst Person in the World”. /Telegrafi/