Zëdhënësi i Ministrisë së Shëndetësisë, Faik Hoti, për RTV Dukagjinin ka thënë se nga 22 personat që kanë rezultuar pozitiv me coronavirus, vetëm 13 prej tyre janë të hospitalizuar.

Ai ka thënë se 15 persona të tjerë janë në mbikëqyrje, përcjell Telegrafi.

Nga të prekurit me COVID-19, Hoti thotë se dy pacientët më të moshuar janë në gjendje pak më të rëndë por të qëndrueshme.

Zëdhënësi i Ministrisë së Shëndetësisë thotë se pacientët e shtrirë janë duke u trajtuar me terapitë mbështetëse siç përdoren në gjithë botën.

Hoti thotë se për testimin e qytetarëve vendos IKSHP duke u bazuar në disa parime.

Ai thotë se në dispozicion janë një mijë teste ndërsa janë porositur edhe shtatë mijë të tjera.

“Synimi është që të testohen personat që kanë kontaktuar me të prekurit dhe kontaktet e kontakteve”.

Hoti ka bërë thirrje që të kufizohen lëvizjet e panevojshme dhe të mos dalin në parqe në mënyrë që të evitohet shtimi i rasteve.

“Është e pafalshme që të neglizhohet situata sikurse nuk ka ndodhur asgjë”, tha mes tjerash Faik Hoti./Telegrafi/