Pas ndarjes nga jeta të Gene Hackman dhe bashkëshortes së tij, Betsy Arakawa, më 26 shkurt në shtëpinë e tyre në Santa Fe, autoritetet kanë bërë publike shkaqet e vdekjes së tyre.
Bazuar në pamjet e vëzhgimit, Arakawa, 65 vjeç, besohet të ketë vdekur më 11 shkurt.
Shkaku i vdekjes së saj u gjykua të ishte sindroma pulmonare hantavirus-një sëmundje e rëndë respiratore që transmetohet përmes urinës, jashtëqitjeve dhe pështymës së brejtësve, bazuar në analizat laboratorike.
Sa i përket Hackman, fituesi i dyfishtë i ‘Oscar’, 95 vjeç, besohet se ka vdekur një javë më vonë, më 18 shkurt pasi stimuluesi i kardiakut regjistroi një fibrilacion atrial jonormal ose një ritëm jonormal të zemrës, sipas autoriteteve.
Shkaku i vdekjes së tij është sëmundja kardiovaskulare hipertensionale dhe aterosklerotike (ASCVD) - ose ngurtësimi i arterieve - me sëmundjen e Alzheimerit si një faktor të rëndësishëm kontribues, shkruan eonline.
Hetuesi mjekësor tregoi se Hackman ishte në një gjendje të avancuar të Alzheimerit - një çrregullim neurodegjenerativ i trurit - dhe është shumë e mundur që ai nuk ishte në dijeni që Arakawa kishte vdekur.
Çifti u gjet i vdekur pas një telefonate nga një fqinj që kërkoi një kontroll të mirëqenies.
Qeni i tyre është ende duke u testuar për të përcaktuar shkakun e vdekjes, megjithëse autoritetet sqaruan se qentë nuk mund të infektohen me hantavirus.
Gene Hackman dhe Betsy Arakawa ishin të martuar prej 33 vitesh.
Aktori legjendar ka lënë pas tre fëmijët e tij nga martesa e parë.
Familja ka ndarë një deklaratë ku shprehet e shkatërruar nga humbja, duke e kujtuar Hackman si një baba dhe gjysh të dashur. /Telegrafi/
