Është arritur marrëveshja midis grupit të përkohshëm të rithemelimit të Partisë Demokratike të drejtuar nga ish-kryeministrit Sali Berisha dhe Lëvizjes Socialiste për Integrim të Monika Kryemadhit, për të garuar bashkë në zgjedhjet e pjesshme vendore të 6 marsit, nën emrin “Shtëpia e Lirisë”.

Sipas dokumentit të publikuar, marrëveshja e firmosur nga grupi i Berishës dhe LSI-së ka për qëllim të garantoj fitoren në zgjedhjet e ardhshme dhe t’i sjelli ndryshim vendit.

Aty sqarohet se, “drejtuese politike e koalicionit është Partia Demokratike e Shqipërisë e përfaqësuar nga Komisioni i Përkohshëm i Rithemelimit”.

Më herët, Berisha publikoi edhe logon e “Shtëpisë së Lirisë”. Ish-kryeministri ka konfirmuar se koalicioni me LSI-në do të jetë vetëm për zgjedhjet e pjesshme vendore të 6 marsit.

Ndërkohë që pjesë e koalicionit do të jetë dhe Partia Demokristiane. Marrëveshja është firmosur nga sekretari i përgjithshëm i LSI-së, Endrit Braimllari, Flamur Noka si përfaqësues i Komisionit të Rithemelimit dhe kryetari i Partisë Demokristiane, Nard Ndoka.

Partia Demokratike e drejtuar nga Lulzim Basha gjithashtu ka paraqitur kandidaturat për të marr pjesë në zgjedhje. Kjo krijon një situate te paprecedentë për Partine Demokratike dhe përfaqësuesit e saj.

Shqipëria pritet të mbaj zgjedhje të pjesshme vendore në gjashtë bashki të vendit – Shkodër, Dibër, Durrës, Rrogozhinë, Vorë dhe Lushnje. /Telegrafi/