Walmart është kompania më e madhe në botë për nga të ardhurat për të nëntin vit radhazi sipas revistës “Fortune”, e cila filloi të rendit kompanitë sipas madhësisë së këtij parametri në vitin 1995.

Fortune publikoi të mërkurën listën vjetore “Fortune Global 500”, një renditje e korporatave më të mëdha dhe më fitimprurëse në botë. Saudi Aramco, kompania e gjashtë më e madhe në botë për nga të ardhurat, tani është kompania më fitimprurëse në botë me 105 miliardë dollarë fitime.

Gjigandi i tregtisë elektronike Amazon zbarkoi në vendin e dytë në listë, me kompaninë elektrike shtetërore kineze State Grid që pretendon vendin e tretë.

Kompania e teknologjisë Apple renditet në vendin e 7-të dhe zinxhiri i farmacive CVS Health renditet në vendin e 10-të. CVS Health ishte e vetmja korporatë në TOP-10 që si udhëheqëse ka një grua – Karen Lynch, raporton cbsnews.

Në vitin 2021, bizneset e të gjitha madhësive u përballën me një rënie të të ardhurave për shkak të problemeve financiare të shkaktuara nga pandemia e coronavirusit. Këtë vit ata përballen me sfida të reja, duke përfshirë inflacionin, frikën e mundshme të recesionit dhe agresionin rus kundër Ukrainës.

Kina, duke përfshirë Hong Kongun, kishte 136 kompani në listën e kompanive më të mëdha të Fortune – më së shumti nga çdo vend. Shtetet e Bashkuara u renditën e dyta, me 124, ndërsa Japonia ishte e treta me 47. Dhe për herë të parë në historinë e renditjes, të ardhurat totale të kompanive të listuara me bazë në vendet kinezishtfolëse kaluan ato të kompanive amerikane në listë.

Të ardhurat totale të kombinuara të kompanive të Fortune 500 u rritën 19 për qind gjatë vitit të kaluar në 37.8 trilion dollarë – ekuivalenti i më shumë se një të tretës së GJDP-së globale. Fitimet kumulative u rritën me 88 për qind krahasuar me vitin e kaluar, duke arritur një rekord prej 3.1 trilionë dollarësh. Kompanitë e listuara kanë gjithsej afro 70 milionë punonjës në mbarë botën.

Këtu janë 10 kompanitë më të mira në Fortune 500 të këtij viti sipas të ardhurave.

Walmart (SHBA)

Amazon (SHBA)

State Grid (Kina)

China National Petroleum (Kina)

Sinopec Group (Kina)

Saudi Aramco (Arabia Saudite)

Apple (SHBA)

Volkswagen (Gjermania)

China State Construction Engineering (Kina)

CVS Health (SHBA) /Telegrafi/