Vuçiqi i provokoi, Kurti e Bislimi reaguan ashpër kur në takim u paraqit Ekipi Menaxhues serb për Asociacionin

Shefja e Ekipit Menaxhues për Asociacionin, Danijela Vujiçiq, u tha gazetarëve në Bruksel se në takimin e presidentit të Serbisë, Aleksandar Vuçiq dhe kryeministrit të Kosovës, Albin Kurti, i cili po mbahet nën ndërmjetësimin e BE-së, ka prezantuar Draft Statutin e Asociacionit të komunave me shumicë serbe. Siç ka theksuar ajo, prezantimi ka qenë i pakëndshëm për shkak se delegacioni i Kosovës i ka “hedhur” fjalë.

Kryeministri i Kosovës, Albin Kurti dhe presidenti serb Aleksandar Vuçiq po takohen sonte në Bruksel, në kuadër të raundit të ri të dialogut nën patronazhin e BE-së.

Në fillim të takimit të sotëm u miratua Deklarata për Personat e Zhdukur dhe më pas u prezantua Drafti i parë i Statutit të Asociacionit i cili është përgatitur nga Ekipi Menaxhues, i cili përbëhet nga katër persona nga komuniteti serb, në krye me deputeten në Parlamenti i Serbisë, Danijela Vujiçiq.

Siç raporton “N1“, Vujiçiq u tha gazetarëve në Bruksel se në 30 minutat sa i dha BE për formatin e bisedimeve të nivelit të lartë, ishte e pamundur të prezantoheshin të 67 nenet dhe nëntë kapitujt e Statutit.

“Është punë e madhe që vetë delegacioni ta lexojë nen për nen dhe palët të shprehin vërejtjet e tyre”, shtoi ajo.

Megjithatë, Vujiçiq theksoi se ajo dhe kolegia e saj nga Ekipi Menaxhues, Jelena Beloviq, kanë përjetuar siklet, sepse përfaqësuesit e Prishtinës – kryeministri Albin Kurti dhe shefi i ekipit negociator, Besnik Bislimi – vazhdimisht u kanë hedhur fjalë dhe i kanë tallur.

Ajo ka thënë se “kaosi ka lindur” menjëherë pasi kanë hyrë në ambientet ku po mbahej takimi kur presidenti Vuçiq u ka thënë: “Ku jeni serbet e mia nga ‘Kosova dhe Metohia serbe’”, për çka, siç tha ajo, delegacioni i Kosovës ka reaguar ashpër.

Danijela Vujiçiq, nga ky ekip, tha se hartimi i draftit ka zgjatur katër muaj – nga prilli 2018 deri në gusht 2018.

“Sot, pas pesë vjetësh, patëm rastin ta prezantojmë draftin e përfunduar në vitin 2018”, u tha Vujiçiq gazetarëve.

“Ne i përmbaheshim kornizës sonë dhe ia dolëm dhe më besoni Statuti është i shkëlqyer”, tha ajo. /Telegrafi/