Vrasja e Marigona Osmanit, Apeli e kthen në rigjykim rastin ndaj Dardan Krivaqës dhe Arbër Sejdiut

Gjykata e Apelit e ka kthyer çështjen në rigjykim ndaj të akuzuarve Dardan Krivaqa dhe Arbër Sejdiu, lidhur me akuzat për vrasjen dhe dhunimi e tani të ndjerës Marigona Osmani.

Gjykata Themelore e Ferizajt më 4 gusht 2023 e ka dënuar me burgim të përjetshëm Dardan Krivaqën për vrasje e Marigona Osmanit. Ndërsa ishte liruar nga akuza për dhunim. Arbër Sejdiu ishte dënuar me 15 vite burgim për ndihmë në vrasjen e rëndë në bashkëkryerje. Sejdiu ishte liruar nga vepra penale e ndihmës në dhunim.

Në vendimin Gjykatës së Apelit, thuhet se është aprovuar  ankesa e Prokurorisë Themelore në Ferizaj dhe ankesat e mbrojtësit të të akuzuarit Krivaqa, avokatit Admir  Salihu dhe mbrojtësve të Sejdiut, avokatëve Arbnora Shefiku dhe Avni Ibrahimi.

Apeli thekson se pretendimet ankimore të Prokurorisë dhe ato të mbrojtësve për bazat tjera ankimore si dhe të përfaqësuesit të palës së dëmtuar, tani për tani janë jolëndore.

Kurse, dy të akuzuarit mbeten në paraburgim deri në një vendim tjetër nga ana e gjykatës së shkallës së parë.

Ndaj vendimit të Themelores, prokurori i Prokurorisë Themelore në Ferizaj, kishte ushtruar ankesë për shkak të shkeljes esenciale të dispozitave të procedurës penale, vërtetimit të gabueshëm dhe jo të plotë të gjendjes faktike dhe vendimit lidhur me sanksionin penal sa i përket të akuzuarit Sejdiu, raporton “Betimi për Drejtësi“.

Prokuroria kishte kërkuar nga Apeli që ta aprovojë në tërësi ankesën dhe ta anulojë aktgjykimin e ankimuar dhe çështjen t’ia kthejë Gjykatës së shkallës së parë në rigjykim për rivendosje.

Në anën tjetër, mbrojtësi i Krivaqës, avokati Admir Salihu, kishte ushtruar ankesë për shkak të shkeljes esenciale të dispozitave të procedurës penale dhe lidhur me vendimin mbi sanksionin penal, me propozimin që Apeli ta ndryshojë aktgjykimin ose çështjen ta kthejë në rigjykim.

Lexo po ashtu Familja e Marigona Osmanit kërkon që Arbër Sejdiut t’i rritet dënimi në 25 vjet apo burgim të përjetshëm

Mbrojtësit e Sejdiut, avokatët Arbnora Shefkiu dhe Avni Ibrahimi, kishin ushtruar ankesë për shkak të shkeljes esenciale të dispozitave të procedurës penale, shkeljes së Ligjit Penal dhe vërtetimit të gabuar ose jo të plotë të gjendjes faktike, me propozimin që Apeli ta ndryshojë aktgjykimin, ashtu që të akuzuarin Sejdiu ta e lirojë nga aktakuza ose çështjen ta kthejë në rigjykim.

Përfaqësuesi i palës së dëmtuar, avokati Gazmend Rexhepi, kishte ushtruar ankesë për shkak të shkeljes së Ligjit Penal, vërtetimit të gabuar dhe jo të drejtë të gjendjes faktike, si dhe vendimit mbi sanksionin penal, me propozimin që ndaj të akuzuarit Sejdiu të vërtetohet aktakuza e Prokurorisë dhe të njëjtit t’i shqiptohet dënimi sipas nenit 31 të Kodit Penal, për bashkëkryerje, si dhe vendimi mbi sanksionin penal ndaj të akuzuarit Sejdiu të rritet, ashtu që t’i shqiptohet dënimi kapital.

Kurse, Prokuroria e Apelit më parashtresë ka propozuar që të aprovohen si të bazuara ankesa e Prokurorisë Themelore Ferizaj dhe e përfaqësuesit të palës së dëmtuar, avokatit Gazmend Rexhepi, ashtu që të anulohet aktgjykimi i ankimuar dhe lënda të kthehet në rigjykim dhe rivendosje. Ndërsa, kishte kërkuar ankesat e mbrojtjes së të akuzuarve të refuzohen si të pabazuara.

Sipas vendimit të Apelit të marrë më 22 shkurt 2024, shkeljet esenciale të dispozitave të procedurës penale konsistojnë në faktin se dispozitivi është i paqartë, i pakuptueshëm dhe jo në harmoni me dispozitat ligjore.

Po ashtu sipas Apelit, dispozitivi i aktgjykimi nga shkalla e parë është ndërtuar duke marrë për bazë kryesisht motivin e xhelozisë për kryerjen e kësaj vepre.

“Përveç kësaj motivin e xhelozisë të inkorporuar në dispozitiv të aktgjykimit, gjykata e shkallës së parë e bazon në deklaratën e të akuzuarit D.K, të dhënë gjatë ekzaminimit nga ana e eksperteve në Institutin e Psikiatrisë Forenzike, e cila deklaratë është dhënë pa udhëzimet paraprake të akuzuarit dhe pa prezencën e mbrojtësit të tij…”, thuhet në këtë vendim.

Gjithnjë sipas këtij vendimi, thuhet se mënyra e ndërtimit të akuzës dhe me pas e ricilësimit nga gjykata e shkallës së parë, sipas Apelit është hipotetike e dykuptimshme dhe e bën konfuz aktgjykimin.

Gjithashtu, edhe për të akuzuarin Sejdiu, Apeli ka gjetur se përkundër ricilësimit të kësaj vepre penale nuk ka të arsye të qarta dhe bindëse se cilat ishin veprimet e Sejdiut në drejtim të veprës penale.

Pasi kjo sipas Apelit nga përshkrimi i arsyeve të dhëna si në aktgjykim të shkallës së parë, vërtetohen vetëm nga kamerat e vendosura nga i akuzuari tjetër Krivaqa dhe jo me ndonjë provë tjetër.

Sipas Apelit, në aktgjykim dhe të shënohen faktet dhe rrethanat që përbëjnë figurën e veprës penale në mënyrë të qartë dhe se veprimi i cili përbën elemente të veprës penale duhet të jetë në pajtueshmëri me tiparet e veprës penale për të cilat shpallet fajtor i akuzuari.

Në fund, Apeli ka udhëzuar Gjykatën Themelore në Ferizaj që gjatë rigjykimit të kujdeset që veprimet e të akuzuarve të përfshihen në norma materiale të veprave penale përfshirë edhe pjesën liruese, duke i saktësuar qartë dhe kuptueshëm të gjitha faktet.

Tutje, nga Apeli është udhëzuar që provat e administruara nga palët në procedurë të administrohen secila veç e veç në ndërlidhshmëri me njëra-tjetrën dhe se në fund të mund të dilet me një vendim të drejtë dhe të ligjshëm.

Po ashtu, Apeli i ka kërkuar Themelores që gjatë rigjykimit të angazhojë ekspertë të Instituti i Mjekësisë Ligjore dhe se për Sjediun të arrihet të dëshmohet vepra penale e ndihmës, duke ftuar dëshmitarë dhe të pyeten nëse kanë dëgjuar ndonjë zhurmë.

18 vjeçarja Marigona Osmani u vra më 22 gusht të vitit 2021 në banesën e të akuzuarit kryesor, Dardan Krivaqa, në qytetin e Ferizajt.

Sipas aktakuzës, Dardan Krivaqa thuhet se më 21 gusht 2021, rreth orës 10:14, në banesën e tij, pa pëlqimin e tani të ndjerës Marigona Osmani, e kishte detyruar atë të kryente marrëdhënie seksuale dhe e kishte abuzuar e maltretuar në forma të ndryshme.

Një ditë më pas, më 22 gusht 2021, Krivaqa dhe Sejdiu akuzohen se kanë privuar nga jeta Marigona Osmanin, në përpjekje për të fshehur veprën penale të dhunimit.

Më 14 korrik 2022, ishte mbajtur seanca fillestare ku Dardan Krivaqa ka shfrytëzuar të drejtën të mbrohet në heshtje, kurse Arbër Sejdiu, është deklaruar i pafajshëm.

Krivaqën, Prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.

Sipas aktakuzës, i pandehuri Dardan Krivaqa më 21 gusht 2021, rreth orës 10:14, në banesën e tij në rrugën “Ramadan Rexhepi”, në Ferizaj, pa pëlqimin e tani të ndjerës Marigona Osmani, e kishte detyruar të njëjtën për të kryer marrëdhënie seksuale, e cila siç thuhet në aktakuzë përcillet me tortura.

Gjithnjë sipas aktakuzës, aty thuhet se i pandehuri Krivaqa fillimisht pa dëshirën e tani të ndjerës ka kryer marrëdhënie seksuale në sallon, pas kryerjes së aktit seksual të njëjtën të zhveshur e kishte dërguar në banjo, nga aty me dhunë e kishte dërguar në dhomën e gjumit, mirëpo me kalimin e kohës për shkak të gjendjes së rëndë shëndetësore tani e ndjera Marigona Osmani si pasojë e dhunës së ushtruar kishte humbur aftësinë për të rezistuar, e ku në dy raste në mbrëmje kishin kryer marrëdhënie seksuale, pastaj i pandehuri Dardan të zhveshur e kishte dërguar në banjë, e ku i vërehen edhe lëndimet në trup.

Me këtë, akuzohet se ka kryer veprën penale “Dhunimi” nga neni 227, par. 4, nënpar 4.1, lidhur me par.1 të Kodit Penal.

Sipas dispozitivit të dytë të kësaj aktakuze, i pandehuri Arbër Sejdiu më 21 gusht 2021, në banesën e të pandehurit të parë në rrugën “Ramadan Rexhepi”, në Ferizaj, me dashje i kishte ndihmuar të pandehurit Dardan Krivaqa në kryerjen e veprës penale të dhunimit.

Sipas aktit akuzues thuhet se fillimisht dy të pandehurit kishin kontaktuar përmes telefonit dhe ishin takuar në qytet, pastaj së bashku ishin kthyer në banesë, ku i pandehuri Arbër posa kishte arritur, duke qenë në dijeni se i pandehuri Dardan është duke e dhunuar tani të ndjerën Marigona Osmani, me dashje kishte marrë veprime me të cilat lehtësohet kryerja e dhunimit.

Tutje thuhet se dy të pandehurit së bashku kishin hyrë në dhomën ku kryhet dhunimi, e ku e ndjera ishte e zhveshur, e të cilin veprim gjatë qëndrimit në banesë e merr disa herë, po ashtu dhe gjatë asaj kohe kishte përcjellë gjendjen nëse ndonjë nga banorët është duke lëvizur aty pari.

Siç e përshkruan aktakuza, i pandehuri Arbër Sejdiu po ashtu edhe disa herë kishte dalë nga banesa për të blerë gjëra ushqimore, ndërsa gjatë gjithë kohës dy të pandehurit kishin biseduar mes vete, kështu tutje, të pandehurit Dardan Krivaqa i kishte dhënë telefonin për të thirrë kompaninë e cila menaxhon kamerën, që ishte e vendosur në korridorin e banesës me qëllim që të fshihen video-incizimet, gjegjësisht provat e veprës penale.

Me këtë, Sejdiu akuzohet se ka kryer veprën penale “Ndihmë në kryerjen e dhunimit” nga neni 227, par 4, nënpar. 4.1, lidhur me par. 1 dhe nenin 33 të Kodit Penal.

Kjo aktakuzë në dispozitivin e III-të, dy të pandehurit Dardan Krivaqa dhe Arbër Sejdiu i ngarkon për veprën penale të vrasjes së rëndë në bashkëkryerje.

Aty thuhet se më 22 gusht 2021, në banesën e të pandehurit Dardan Krivaqa, në rrugën “Ramadan “Rexhepi”, në Ferizaj, me dashje dhe në bashkëkryerje, me qëllim të fshehjes së veprës penale dhunimi e kanë privuar nga jeta tani të ndjerën Marigona Osmani, me të cilën i pandehuri i parë ishte në bashkësi jashtëmartesore.

Tutje, sipas aktakuzës, përshkruhet se në intervale kohore nga ora 10:56 deri në orën 14:43, i pandehuri i parë kishte marrë një shkop, e së bashku me të pandehurin e dytë kishin hyrë në dhomë dhe kishin filluar ta godasin tani të ndjerën në pjesë të ndryshme të trupit, me ç’rast të njëjtës i kanë shkaktuar dhimbje të mëdha fizike dhe psiqike, ku nga goditjet e njëjta ka pësuar politrauma-lëndime të shumëfishta, ku vdekja shkaktohet drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerja e ashtit të nofullës së poshtme, thyerja e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty.

Me këtë, akuzohen se në bashkëkryerje kanë kryer veprën penale “Vrasja e rëndë” nga neni 173, par. 1, nënpar. 1.3, 1.4 dhe 1.7, lidhur me nenin 31 të Kodit Penal.