Vjen reagimi i Qëndron Kastratit: Hyrja e militarëve të armatosur serbë në Karaçevë, provokim dhe terrorizim i qytetarëve të kësaj zone

Pas publikimit të pamjeve të xhandarmërisë serbe, ku janë parë në dy vende duke hyrë në zonën kufitare në fshatin Karaçevë të Kamenicës, ka reaguar edhe kryetari i kësaj komune, Qëndron Kastrati.

Kastrati përmes një postimi në Facebook ka thënë se është tejet shqetësuese që përsëri sot gjatë ditës janë parë ushtria serbe në territorin e Kosovës, madje në një zonë të frekuentuar nga banorë të të gjitha moshave.

Ai e ka quajtur këtë një provokim dhe terrorizim i qytetarëve të kësaj ane.

“Është tejet shqetësuese që përsëri sot gjatë ditës disa paramilitarë apo militarë të armatosur serb, hyn në territorin e Kosovës, konkretisht në fshatin Karaçevë. Siç shihet në edhe në video, ata kanë ardhur në një zonë të frekuentuar nga banorët e të gjitha moshave. Provokimi i vazhdueshëm dhe terrorizimi i qytetarëve të kësaj ane, është i papranueshëm. Ky është kërcënim direkt për banorët e Karaçevës dhe për gjithë shtetin tonë. Lidhur me këtë çështje u kam nisur shkresë zyrtare Presidentit të Kosovës, Kryeministrit, Ministrit të Mbrojtjes e atij të Punëve të Brendshme, që konform kompetencave të tyre të veprojnë në këtë drejtim”, shkruan Kastrati.

Ndryshe, banorët e fshatit Karaçevë të Kamenicës janë shprehur tejet të brengosur, për faktin se nëpër parkingun e një restoranti të këtij fshati janë parë dhe filmuar pjesëtarët e xhandarmerisë serbe duke kaluar.

Lexo po ashtu Shqetësohen banorët e Karaçevës, xhandarmeria serbe filmohet nga kamerat e sigurisë duke kaluar në parkingun e një restoranti

Madje ata theksojnë se ngjarja është filmuar një kilometër në brendësi të territorit të Kosovës, më saktësisht në parkingun e restorantit “Oxygen”, ku pronari i lokalit Adhurim Krasniqi, ka publikuar pamjet e këtij momenti, transmeton Telegrafi.

Kurse, ish-kryetari i Kamenicës, Shaip Surdulli ka publikuar pamje të reja ku shihen xhandarmëria serbe duke hyrë në territorin e Republikës së Kosovës.

Lexo po ashtu Dalin pamje të reja të xhandarmërisë serbe në Karaçevë, kërkohet intervenimi i KFOR-it dhe institucioneve qendrore të Kosovës

Përmes një postimi në Facebook, Surdulli ka bërë apel tek institucionet e Kosovës dhe KFOR-in, që të ndërmarrin masa që këto veprime të mos përsëriten.

Sipas tij kjo ka ndikuar shumë në popullatën e kësaj zone, duke bërë që edhe qytetarën e zonës kufitare të shpërngulen nga aty. /Telegrafi/