Vizita e presidentes në NATO, analistët: Pse nuk është ftuar Kurti, por Osmani

Analistët dhe njohësit e çështjeve politike kanë komentuar vizitën e presidentes Vjosa Osmani në selinë e NATO-s, ku është takuar me Sekretarin e Përgjithshëm, Jens Stoltenberg.

Njohësi i çështjeve politike, Visar Ymeri tha se çështje për diskutim është se pse është ftuar presidentja, Vjosa Osmani, në selinë e NATO-s dhe jo kryeministri, Albin Kurti.

Pasi sipas Ymerit, ky takim ishte për procesin e Dialogut dhe procesin e shtesionimit të situatës në veri të Kosovës dhe këto i takojnë Qeverisë.

“Për mua është e çuditshme pse është ftuar presidentja në NATO e jo kryeministri, meqë ky takim dhe ato çka janë folur është kryekëput për procesin Dialogut dhe procesin e shtensionimit. Dhe masat dhe vendimet për shtensionim nuk i takojnë presidencës i takojnë ekzekutivit, se janë masa ekzekutive. Për mua kjo është çështje për tu diskutuar”, ka thënë Ymeri në “Debat Plus”.

Ymeri ka komentuar edhe deklaratën e Sekretarin të Përgjithshëm të NATO-së, Jens Stoltenberg, lidhur me kërkesën që FSK dhe Policia e Kosovës duhet t’i bëjnë KFOR-it para se të shkojnë në veri.

“Kemi më pak sovranitet. Nëse forcat e KFOR-it do të jenë vendimmarrës ose bashkëvendimmarrës për këtë çështje, atëherë i bie që Qeveria e Kosovës, komanda e Policisë, nuk mund të marrin vendim pa miratim, për operacionet policore. Sa do të paraqesë kjo problem në praktike nuk e di”, ka thënë Ymeri.

Analisti politik, Dardan Gashi, ka vlerësuar se veprimet Qeverisë së Kosovës në veri të Mitrovicës kanë rezultuar në dështime dhe situata regresive.

Gashi theksuar se shfrytëzimi i situatës në veri të Kosovës mund të ketë motive të tjera, duke përfshirë ndryshimin e fokusit të opinionit publik dhe kthimin e vëmendjes së tyre nga çështjet e tjera në vend.

Sipas tij, pas çdo “turbullire të brendshme” në Qeverinë e Kosovës, vetë kryeministri Albin Kurti ka potencial për të thelluar problemet në veri të vendit.

Në lidhje me kërkesën e NATO-s, Gashi ka theksuar rëndësinë e pajtimit me Forcat e NATO-s për çdo ndërhyrje të Forcave Speciale të Kosovës në veri.

Ai ka përfunduar duke thënë se KFOR-i është përgjegjës për sigurinë dhe stabilitetin në këtë zonë dhe duhet të konsultohet në çdo veprim që ka të bëjë me sigurinë.

“Sepse çka përmirësohet edhe nëse merren këto ndërtesa, ata brenda ndërtesës e kanë bërë peng vetën. Edhe nuk i ka sjell kurrfarë lëvizje politike pozitive Kosovës, as veriut, as Mitrovicës, as atyre komunave tjera. Në Graçanicë ka objekte, nuk ka nevojë të shkojë në pikat më të ndejshme, ku krijohen konfliktet. Besoj se në këtë mënyrë ka dashur sekretari i NATO-së, sepse është tepruar më këto. Natyrisht që KFOR- është përgjegjës, nuk është asgjë e re për me u pyet KFOR-i edhe me u konsultu për veprime kur është në pyetje siguria, sepse është përgjegjës”, ka deklaruar Gashi.

Në anën tjetër analisti Astrit Gashi, ka deklaruar se sanksionet dhe refuzimet që janë ndërmarrë nga BE-ja kundër kryeministrit Albin Kurti kanë një qëllim të vetëm, dhe këtë qëllim e ka përshkruar si përpjekjen për ta bindur Kurtin të pranojë diçka që ai nuk e dëshiron.

Në këtë kontekst, ai ka shtuar se Kurti është i vendosur dhe nuk ka në plan të themelojë një Serbi në territorin e Kosovës.

“Pra lufta edhe izolimi i Kurtit, edhe ju që po thoni nuk po e shohim izolimin e Kurtit, veç me ua vizatu. Izolim klasikë është për me e kry marrëveshjen që e ka nënshkruar. Pra i gjithë synimi është me e bind Kurtin me kry diçka që Kurti nuk po dëshiron. Sepse se ka në plan të hyjë në histori duke e themelu një Serbi në Kosovë”, ka deklaruar tutje Gashi në Debat Plus. /RTVD/