Veseli: Me lejimin e mjekëve të Serbisë në Kosovë, u fyen mjekët dhe infermierët tanë

Kryetari i Partisë Demokratike të Kosovës, Kadri Veseli ka shprehur mirënjohjen për rolin vendimtar që kanë luajtur infermierët në luftën kundër pandemisë së coronavirusit, ndërsa theksoi se një ndër fyerjet më të mëdha që iu është bërë infermierëve dhe mjekëve të Kosovës nga qeveria e shkarkuar, ka qenë lejimi i hyrjes dhe veprimit në Kosovë të stafeve mjekësore të shtetit serb në Kosovë.

Veseli në një postim në rrjetin social Facebook shkruan se nuk do të duhej të ishte pranuar ndihma prej Serbisë, gjë që sipas tij, i dha mundësi të rehabilitonte imazhin ndërkombëtar.

Ky është postimi i Veselit në Facebook:

“Sot është Dita Ndërkombëtare e Infermiereve, e cila përkon me jubileun e 200-të të lindjes së Florence Nightingale, e cila konsiderohet themeluesja e infermierisë në botë. Në këtë ditë të shënuar shprehim mirënjohjen për rolin vendimtar që kanë luajtur infermierët në luftën kundër pandemisë së coronavirusit, të cilët çdo ditë janë përballur drejtpërdrejtë me kurajo e përkushtim me rrezikun e infeksionit. Urimet më të mira për të gjithë ata që ushtrojnë këtë profesion fisnik!

Një ndër fyerjet më të mëdha që iu është bërë infermierëve dhe mjekëve të Kosovës nga qeveria e shkarkuar, ka qenë lejimi i hyrjes dhe veprimit në Kosovë të stafeve mjekësore të shtetit serb në Kosovë. Kosova aktualisht ka qindra infermierë e mjek që janë papunë, me kualifikime cilësore që njihen e kërkohen edhe në Gjermani apo vende skandinave, të cilët fare mirë mund të ishin angazhuar prej shtetit, për t’u kujdesur për çdo qytetar tonin, pavarësisht kombësisë.

Jo vetëm që nuk duhej të ishte pranuar ndihma prej Serbisë, gjë që i dha mundësi të rehabilitonte imazhin ndërkombëtar duke u shitur si shtet humanitar, por vetë Kosova duhej t’i ofronte ndihmë vendeve mike. Ne kemi mjaftueshëm të rinj infermierë e mjek të talentuar pa punë që, sikurse Shqipëria në Itali, në mënyrë të organizuar mund t’i kishim dërguar për të ofruar një kontribut humanitar, qoftë edhe modest por kuptimplotë ndaj shteteve aleate që na kanë shpëtuar në kohët më të vështira”. /Telegrafi/