Verë ‘e majme’ për estradën kosovare: 10 milionë euro qarkullim veç për tre muaj, ATK i dënoi 329 herë

Estrada e Kosovës po vazhdon të ketë fitime të majme në koncerte, dasma e tjera evenimente ku ata performojnë.

Të dhënat zyrtare që Telegrafi ka siguruar flasin për miliona euro qarkullim veç përbrenda tre muajve të verës; korrik, gusht, shtator.

Kësisoj, vetëm gjatë kësaj periudhe, estrada pati qarkullim prej 10 milionë eurosh.

E për tetë muaj, nga janari deri në gusht, kjo kategori i pagoi shtetit 2.3 milionë euro në formë tatimesh.

Lexo po ashtu Të gjitha lajmet nga Administrata Tatimore e Kosovës

Nga ATK, për Telegrafin thonë se këtë vit ka pasur rritje të konsiderueshme të tatimeve të mbledhura nga ky institucion nga këngëtarët.

“Nga janari-gusht 2024, ATK ka mbledhur tatime në vlerë 2.3 milionë euro, kjo rritje e konsiderueshme në deklarimin dhe pagesën e tatimeve vjen nga këngëtarët dhe performuesit e tjerë të industrisë muzikore”, thotë për Telegrafin, zëdhënësja e ATK-së, Valentina Bytyqi – Sefa.

Një deklarim i tillë i Bytyqi – Sefës mbështetet në të dhënat zyrtare që e konfirmojnë konstatimin e saj.

Kjo për shkakun se për shembull, përgjatë periudhës së njëjtë, pra janar – gusht të vitit të kaluar, 2023, ishin mbledhur 1 milionë e 848 mijë euro tatime nga estrada, gjersa siç e cekëm më lartë, kjo shumë është për 493 mijë euro më e madhe tetë muajt e parë të 2024-ës.

E derisa kjo industri sjell para marrë parasysh çmimet stratosferike që kanë këngëtarët elitarë kosovarë të estradës për të performuar në koncerte e dasma, ka pasur edhe të tillë që në një formë apo tjetrën kanë tentuar t’i shmangen deklarimit të saktë apo kanë bërë devijime tjera ndaj shtetit.

Lexo po ashtu Adelina Berisha reagon e shokuar pasi u dënua me 72 mijë euro nga ATK-ja: E padrejtë!

E për të njëjtit, ATK ka shpërndarë gjithsej 329 gjoba, në vlerë totale prej 136 mijë e 350 eurosh.

Administrata Tatimore e Kosovës ka mekanizma të fortë për mbledhjen dhe evidentimin e fitimeve dhe përcaktimit të tatimeve më pas nga kategoria e estradës.

Në raste të caktuara, është vënë në funksion edhe intelegjenca financiare. /Telegrafi/