Vdes zyrtari i LDK-së në Suharekë, Remzi Kololli

Lidhja Demokratike e Kosovës dega në Suharekë, ka njoftuar se ka ndërruar jetë veprimtari i kësaj partie, Remzi Kololli.

Sipas njoftimit të LDK-së, thuhet se i ndjeri kishte filluar veprimtarinë patriotike qysh nga fillimi i lëvizjes gjithpopullore në Lidhjen Demokratike të Kosovës, në shërbim të lirisë e demokracisë.

“Dita e sotme për degën e LDK-së në Therandë, filloi me një lajm tepër pikëllues. Është ndarë nga jeta njëri prej veprimtarëve më të devotshëm të LDK-së Ing. Remzi Kololli. I ndjeri kishte filluar veprimtarinë patriotike qysh nga fillimi i lëvizjes gjithpopullore në Lidhjen Demokratike të Kosovës, në shërbim të lirisë e demokracisë. Ishte veprimtar i paepur i LDK-së, puna, përkushtimi e sinqeriteti qenë prej virtyteve që karakterizonin personalitetin e tij”, thuhet në njoftimin e LDK-së.

Më tej në njoftim thuhet se Kololli u zgjodh e u rizgjodh kryetar i nëndegës së LDK-së në Budakovë.

“Post të cilin e mbajti me përgjegjësi të lartë e përkushtim të madh. Dega e LDK-së në Therandë, shpreh ngushëllimet më të sinqerta familjes, rrethit e shoqërisë. I qoftë i lehtë dheu i Kosovës”, thuhet në njoftim.

Lexo po ashtu Vetëvritet një person në Suharekë

Ndryshe Telegrafi mëson nga burime se i njëjti dyshohet të ketë bërë vetëvrasje.

Lidhur me këtë Telegrafi ka kontaktuar edhe me Policinë e Kosovës, të cilët kanë thënë se është raportuar për një rast vetëvrasje në fshatin Budakovë të Suharekës

“Më datë 22 prill 2021 rreth orës 23:27 minuta, një qytetar përkatësisht djali i viktimës ka informuar policinë se prindi i tij, përkatësisht babai ka lënduar veten si pasojë e lëndimit me armë zjarri. I lënduari është dërguar në QKMF në Suharekë ku edhe është konstatuar vdekja e tij si pasojë e lëndimit nga arma e zjarrit”, ka thënë zëdhënësi i policisë për rajonin e Prizrenit, Shaban Osmanollaj.

Osmanollaj theksoi se policia në Suharekë dhe Hetimet Rajonale së bashku me forenzikën kanë dalë në vendin e ngjarjes dhe në cilësinë e provës materiale kanë sekuestruar një pistolete, 82 fishek të pistoletës dhe një telefon.

“Sipas deklaratave të familjarëve, viktima ka pasur probleme shëndetësore dhe ka vuajtur nga depresioni, ku sipas tyre dhe dokumentacionit mjekësor i njëjti ka qenë duke kryer kontrolla mjekësore. Rasti është nën hetim dhe me njoftim të prokurorit rasti është duke u hetuar për vetëvrasje”, ka thënë Osmanollaj. /Telegrafi/