VARET NGA FORMA

Rrëfenjë turke
Përktheu: Bajram Karabolli

Sulltani pa një ëndërr sikur i kishin rënë të gjithë dhëmbët. Kur u zgjua dha urdhër t´i sillnin një dijetar që t´i shpjegonte ëndrrën.

– Ç´fatkeqësi, Madhëri! – gati klithi dijetari. – Çdo dhëmb i rënë është një i afërm Juaji që ikën nga kjo botë.

– Ç´paturpësi! – bërtiti sulltani gjithë zemërim. – Si guxon të më thuash gjëra të tilla? Shporru këtej!

Thirri rojet dhe i urdhëroi ta fshikullonin një qind herë me kamxhik.

Lexo po ashtu:

– Tiran apo guvernator?
– Beu i pasur dhe rapsodi i varfër

Më vonë urdhëroi që t´i sillnin një dijetar tjetër dhe i tregoi ëndrrën që kishte parë. Ky, pasi e dëgjoi sulltanin me vëmendje, i tha:

– Shkëlqesi, Zoti ka ruajtur për Ju një lumturi të madhe. Ëndrra që keni parë tregon se Ju do të rroni më shumë se gjithë të afërmit Tuaj, pra, do të jetoni edhe pasi ata që ju rrethojnë nuk do të jenë më.

Sulltanit i qeshi nuri. I gëzuar sa s´ka më, urdhëroi që t´i jepnin dijetarit një qind monedha ari. Kur ky doli nga pallati, një nga oborrtarët, gjithë admirim, i tha:

– Sa interesante! Shpjegimi që i bëre ti ëndrrës ishte i njëjtë me atë të dijetarit të parë. Nuk e kuptova pse atë e pagoi me njëqind kamxhikë, ndërsa ty me njëqind monedha ari.

– Mos harro, miku im, – iu përgjigj dijetari i dytë, – se gjithçka varet nga forma apo mënyra si e thua. Një nga sfidat e mëdha të njerëzimit është të mësojë se si të komunikojë … Nga mënyra e të komunikuarit, shpesh herë varet lumturia apo fatkeqësia, paqja apo lufta. Që e vërteta duhet thënë kurdoherë, kjo s´ka dyshim, por mënyra si e thua është ajo që në disa raste shkakton probleme të mëdha. Kësisoj, e vërteta mund të krahasohet me një gurë të çmuar. Në qoftë se këtë gur të çmuar ia përplasim dikujt në fytyrë, mund ta plagosim, por në qoftë se e kemi futur në një kutizë të bukur dhe ia ofrojmë gjithë mirësjellje e delikatesë, ai do të lumturohet e do ta pranojë gjithë kënaqësi.