Opinione

VAR-i poli(e)tik: Stickers marrëveshja

Mirë për neve, keq për ata. Keq për neve, mirë për ata. Mirë për të gjithë, apo për askënd?

Po bie perdja e aktit të radhës së dramës në veri të vendit.

Lajçaku i Brukselit dhe Escobari i Amerikës e bënë punën e tyre.

Me shpresën se do t’i shkrepte strategjia e bllokimit të rrugëve në veri, në ditën e vendosjes së reciprocitetit për targat Vuçiqi pati refuzuar propozimin e Kurtit, që çështja të zgjidhej në Bruksel.

Kësaj radhe, presidenti serb ia huqi në llogarinë e tij pasuese të politikës dhe projekteve të “Kasapit të Ballkanit”.

Nuk i bënë punë barrikadat, as provokimet e serbëve ndaj pjesëtarëve të Policisë së Kosovës e as “teatri” me tanke, helikopterë e aeroplanë pranë kufirit me Kosovën.

Pasi u tha se përjetoi makthe në gati dy javë pa gjumë, duke parë se po i dështon skenari për provokimin e situatave të dhunës në veri, Vuçiqi kërkoi instruksionet nga vëllai i madh në Moskë dhe sivëllai në Pekin. Dhe, sakaq u bë pishman.

E pranoi se për dalje nga situata, të cilën e krijoi vet, adresë ishte Brukseli.

Përfundoi edhe “teatri” i Vulinit afër kufirit me Kosovën, demonstrim force ky që, përveç se ngrohu zemrat e serbëve pranë kamionëve që bllokonin rrugën, nuk frikësoi askënd.

Argatët e projektit të Vuçiqit për ndarjen e Kosovës, të shtunën (më 2 tetor) do t’i heqin çadrat nga veriu, pasi t’i kenë parë pjesëtarët e Njësisë Speciale të Kosovës duke u kthyer në Prishtinë.

Policisë së Kosovës bravo i qoftë që për asnjë moment nuk ra pre e provokimeve të rënda të serbëve, që kishin për detyrë të nxisnin dhunën në veri.

E, nga taborët andej e këndej kufirit, lëvdata, vetëlavdata e kritika për marrëveshjen e (si)reciprocitetit

Pushteti në Kosovë: Po fillon epoka kur Serbia do të mësohet me reciprocitet.

Pushteti në Serbi: Triumfuam ne, sepse e larguam ROSU-n nga veriu. Automjetet me targa serbe do të lëvizin lirshëm në veri.

Opozita në Kosovë: Është kthim prapa. Qeveria u dorëzua përballë bandave kriminale në Serbi.

Se do të kishte reagime të tilla në Kosovë, pas marrëveshjes së të enjtes, e tha menjëherë edhe Vuçiqi: “Do të shihni reagimet në Prishtinë. Për gjysmë ore, një orë, ata do të akuzojnë njëri-tjetrin”.

Ishte e pritshme që pas kësaj marrëveshje të reagojë Dardan Molliqaj me PSD-në e tij. Ata i “stolistën” veturat qeveritare me “stickers”-a (letra ngjitëse), imitim i targave serbe. Por, kësaj radhe policia u tregua tolerante. As i rrahu, as i arrestoi.

Nejse.

Normale të ketë vërejtje dhe mospajtime për një marrëveshje që nuk mund t’i kënaq të gjithë.

Marrëveshjen për targat e cila shtensionon situatën në veri të Kosovës, e përshëndetën ShBA-ja dhe BE-ja.

Por, dilema mbetet.

A është marrëveshja e së enjtes vërtetë reciprocitet nëse në targat e automjeteve që hyjnë nga Serbia në Kosovë – në veri të vendit – do të mbulohen vetëm simbolet shtetërore dhe akronimet “RKS” dhe “RS”, por jo edhe akronimet e targave paralele që lëshohen në Serbi, për qytetet e Kosovës “PR” (Prishtinë), “KM” (Kosovska Mitrovica), “UR” (Uroševac) për Ferizajn …

A do të thotë kjo se pala kosovare u pajtua që veriu të trajtohet si territor me një status të veçantë, e që si synim përfundimtar të jetësohet projekti i Vuçiqit për bashkëngjitje Serbisë?

Sidoqoftë, në ditën kur Njësia Speciale e Policisë së Kosovës do të tërhiqet nga veriu, për t’ia lënë në dorë ushtarëve të KFOR-it që të përkujdesen për sigurinë e lëvizjes në veri, prapa vetes nuk do të lënë barrikadat, as protestuesit serbë.

Atje, përgjatë rrugës, do të mbeten flamujt e shtetit serb dhe Putini i ngjitur në teneqen e kabinës së një stacioni autobusësh.

Në ditën kur në Bruksel u arrit marrëveshja për targat, Serbia ia ktheu Kosovës eshtrat e nëntë shqiptarëve të vrarë 22 vjet më parë gjatë luftës në Kosovë.