Uran Ismaili zyrtarizon kandidaturën për kryetar të Prishtinës

Uran Ismaili edhe zyrtarisht ka shpallur sonte kandidaturën e tij për kryetar të Prishtinës.

Ismaili ka thënë se po i futet kësaj gare për t’ia kthyer Prishtinën qytetarëve.

“Nën flamujt dhe logot partiake u kërkua vota e u fitu pushteti, por për 20 vite Prishtina u trajtu si treg i madh pronash e si koeficient për ndërtime e mbindërtime. Qyteti u trajtu pa vizionin e duhur dhe pa ndjeshmërinë e kërkuar. Me disa vizatime të cilat hidheshin në kosh të mbeturinave pas zgjedhjeve”, ka deklaruar Ismaili.

Ismaili ka shtuar se Lagjet e Prishtinës nuk janë as të partive politike e logove partiake që i kanë shfrytëzu e anashkalu të gjitha lagjet.

“Lagjet e Prishtinës janë tonat dhe duhet ta kthejmë vëmendjen nga to. Dardania, Ulpiana, Aktashi, Kodra e Trimave, Qendra, Mati, fshatrat e Prishtinës… të gjitha janë lënë në harresë”, ka thënë ai.

“Por, unë, si ju e si çdo qytetar i Prishtinës, e njoh qytetin tim, ja njoh ëndrrat, energjinë e paçliruar dhe potencialin që e ka kryeqytet për jetë. E di që na kanë humbë shumë kohë, por jo edhe shpresën se mund ta fitojmë betejën për një Prishtinë të mirë e funksionale”, tha Ismaili.

“E njoh Prishtinën që nuk lejon të përbuzet në pafundësi dhe besoj se ajo Prishtinë është ende gjallë, Prishtina të cilën e kanë mbajtur gjallë qytetarët e saj. Prishtina është kush është për shkak qytetarëve të saj. Dhe kjo është arsyeja kryesore pse unë kandidoj për Kryetar të Prishtinës. Sepse dua tia kthej Prishtinën qytetarëve. Kjo është rruga e vetme për një Prishtinë më të mirë dhe ky është qëllimi im”, ka thënë Ismaili.

Në fund, ai tha se janë tri gjëra të cilat nuk do t’i bëjë asnjëherë.

“1. Unë nuk do ta bëj Prishtinën edhe një arenë tjetër për betejë politike e për parti. Për mua identiteti më i rëndësishëm është Prishtina. Kjo është ajo që ka rëndësi.

2. Unë nuk do ta përdor Komunën për t’i shërbyer çfarëdo interesi politik, personal apo partiak mbi interesin e qytetarëve të Prishtinës.

3. Unë nuk do ta përdor Komunën për t’i shërbyer ndonjë interesi biznesi kundër interesit të qytetarëve të Prishtinës”.