Unioni ndërkombëtar i tifozëve të Atleticos akuzon UEFA-n se ka bërë skandal te penalltia e Julian Alvarez: Pamjet janë edituar

Penalltia e Julian Alvarez gjatë ndeshjes mes Atletico Madridit dhe Real Madridit, në kuadër të çerekfinales së Ligës së Kampionëve, vijon të ngjallë polemika.

Unioni ndërkombëtar i tifozëve të Atleticos ka akuzuar UEFA-n për manipulim të pamjeve filmike të momentit kur Alvarez ekzekuton penalltinë.

Ky union ka kërkuar një analizë të thelluar nga ekspertë të njohur të fushës së mjekësisë ligjore.

Sipas tyre, pamjet e publikuara nga UEFA – me të cilat institucioni synonte të qartësonte situatën – janë modifikuar. Në raportin e ekspertëve thuhet: “Është e qartë se videoja në fjalë është edituar”.

Lexo po ashtu Çfarë u tha Julian Alvarez vëllezërve të tij për penalltinë e anuluar ndaj Real Madridit

Për të mbështetur dyshimet e tyre, Unioni ndërkombëtar i tifozëve të Atleticos ka bashkëpunuar me një kompani të specializuar në analizën forenzike të materialeve audiovizive, duke u fokusuar në versionin e ofruar nga UEFA për të justifikuar anulimin e golit. Sipas tyre, ka prova që materiali është manipuluar, raporton AS.

Në raportin e tyre theksohet: “Kjo na çon drejt një dyshimi të bazuar për qëllimet e atyre që qëndrojnë pas një ndërhyrjeje të tillë”.

Për këtë arsye, Unioni kërkon sqarime nga UEFA dhe i bën thirrje që të publikojë versionin origjinal të videos dhe audios së momentit në fjalë, në mënyrë që të sigurohet transparencë e plotë dhe të kuptohen arsyet e ndërhyrjes në materialin filmik. /Telegrafi/