Trençevska: Votuan Ligj me procedurë të shkurtë, për nevojat e koalicionit

Nuk ka asgjë në aspektin funksional që të përmirësohet gjendja me rikonstruktimin e ministrive dhe hapjen e ministrive të reja. Ky është qëndrimi i Jovanka Trençevskës e cila do të jetë ministrja e fundit e Ministrisë për Punë dhe Politikë Sociale, sepse në të ardhmen kjo ministri do të ketë emër të ri. Akuzon se nuk është mbajtur debat i gjerë as në Kuvend e as me ekspertët të fushës.

“Gjatë gjithë fushatës dëgjuam se do të ulet numri i administratës publike ndërsa ne e rrisim. Nga 16 ministritë aktuale, do të rriten në 20, pra 4 të reja. Kjo është ulje apo rritje e numrit të administratës? Do të duhet të punësohen njerëz të rinj”, tha Jovanka Trençevska – deputete e LSDM-së.

Në periudhën parazgjedhore nga OBRM-PDUKM dëgjuam se sjellja e ligjeve me procedurë të shkurtër do të jetë përjashtim e jo praktikë, rikujton Trençevska.

“Kemi procedurë të shkurtër për një ligj sistematik ku prej 74 neneve, ndryshohen 31 dhe ju e sillni me procedurë të shkurtër, brenda 12 orëve të miratohet i gjithë ligji. Ligji ka implikime fiskale. Zbatimi i këtyre dispozitave do të ketë implikim ndaj buxhetit të shtetit dhe nuk tregoni se sa mjete do të nevojiten për zbatimin e tij”, u shpreh deputetja e LSDM-së, Jovanka Trençevska.

Megjithatë, Mickoski tha se për të gjitha premtimet e dhëna nga programi i tyre parazgjedhor e ka legjitimitetin nga qytetarët. Shtoi se edhe me LSDM ka biseduar për këtë ligj por se nuk e ka marrë përkrahjen e tyre në Kuvend por se përkrahjen e mori nga deputetët e Frontit Europian.

“Atë që nuk e tregon LSDM-ja, por opinioni duhet ta dijë është se unë personalisht gjatë gjithë kësaj kohe isha në komunikim me ta dhe dera ishte e hapur për të gjithë deputetët që duan ta përkrahin këtë ligj. Në lidhje me atë që disa nga deputetët e ardhshëm të opozitës e njohën cilësinë e këtij ligji, ata vetë duhet të përgjigjen, ndërsa pjesë e deputetëve të opozitës nuk e njohën cilësinë ose kishin matematika dhe kalkulime të tjera, andaj nuk votuan”, potencoi kryetari i OBRM-PDUKM-së, Hristijan Mickoski.

Megjithatë Trençevska tha se nuk e di me kë nga LSDM ka biseduar Mickoski për këtë propozim ligj sepse ajo nuk marrë pjesë në negociata të tilla, as si deputete e as si ministre e deritanishme për punë dhe politikë sociale./TV21/