Tragjedia në Bruksel, a ishte planifikuar një sulm më i madh?

Pas sulmeve të Brukselit, autoritetet belge pranuan se kishin bërë gabime në lidhje me një prej kamikazëve të së martës, duke pranuar vetëm pjesërisht kritikat për dështim total në fushën e sigurisë.

Mirëpo tani nuk ka kohë për fjalë, pasi Europa gjendet ne mes të një lufte. Sipas mediave, hetuesit po punojnë nën hamendësimin se kjo celulë terroriste kishte planifikuar një sulm shumë më të madh, në stilin e atyre që u zhvilluan në Paris.

Kjo do të thotë se mund të bëhet fjalë për më shumë militantë që aktualisht mund të jenë në arrati. Në këtë kuadër, drejtori i Europolit, Rob Wainwright, deklaroi se rrejti i xhihadistëve në Europë është më i madh se sa mendohej.

Sipas tij, ka shqetësime për një komunitet prej rreth 5 mijë të dyshuarish që janë radikalizuar në Europë dhe më pas udhëtuan drejt Sirisë dhe Irakut për të fituar eksperiencë luftarake. Jo të gjithë, por një pjesë e tyre tashmë janë kthyer në Europë.

Ndërkohër, zyrtarët turq kanë akuzuar qeveritë europiane se kanë dështuar për të frenuar rekrutimin e të rinjve në radhët e ISIS. Po ashtu, Ankaraja thotë se vendet e BE-së kanë dështuar në verifikimin e dokumenteve të atyre që janë kthyer nga zonat e luftës si edhe theksojnë se ka neglizhencë dhe mungesë kontrolli në pikat e kalimit kufitar.