TIDZ në Tetovë do të bëhet zona e parë e gjelbër e cila do të prodhojë vetë energji elektrike

TIDZ e Tetovës është e vetmja zonë ekonomike që punon në parimin e partneritetit publiko-privat. Zona menaxhohet nga kompania “NORMAK Investing Group”, dhe sipas objekteve të ndërtuara dhe numrit të të punësuarve në zonë, tani është punëdhënësi më i madh në rajonin e Pollogut, përcjell Telegrafi Maqedoni.

Një risi në zhvillimin e mëtejshëm të zonës është njoftimi se së shpejti do të shndërrohet në zonë të gjelbër, pra do të prodhojë energji elektrike nga burime të rinovueshme dhe si e tillë do të jetë zona e parë industriale në vend që do të kujdeset për uljen e ndotjes.

“Tashmë jemi në përfundim të të gjitha përgatitjeve që TIDZ e Tetovës të bëhet zona e parë e gjelbër jo vetëm në nivel rajonal por edhe në nivel shtetëror, ku do të fillojnë investime shtesë në fushën e kapaciteteve të reja për prodhimin e energjisë elektrike nga burimet e rinovueshme. Kjo energji elektrike do të përdoret për nevojat e kompanive që operojnë në zonë, si dhe për kompani të tjera jashtë saj.

TIDZ-Tetovë është e vetmja zonë industriale në vend që funksionon në parimin e partneritetit publiko-privat. Kjo mënyrë pune jep rezultatet e pritura dhe mund të përdoret si model edhe në rajone dhe qytete të tjera të vendit.

Ndërtimi i termocentralit fotovoltaik do të bëhet nga një investitor privat dhe ne si Qeveri, për të inkurajuar dhe stimuluar të gjitha kompanitë tona vendase dhe të huaja për të investuar në burimet e rinovueshme, do të mbështesim me të gjitha mekanizmat ekzistues”, tha ministri i Ekonomisë, Kreshnik Bekteshi.

Bekteshi shtoi se tashmë po punohet për ndryshimin e rregullores në mënyrë që amvisëritë nga 4 të tanishëm të kenë mundësi të instalojnë elementë fotovoltaikë deri në 6 kilovat, që është 50 për qind rritje e fuqisë, ndërsa për kompanitë nga 20 kilovat aktual të rritet në 60 kilovat./Telegrafi/