Thaçi: Vrasja e Mehë Ukës mbetet misterioze

Presidenti i vendit, Hashim Thaçi, sot ka kujtuar Heroin e Kosovës, Mehë Ukën, në 23 vjetorin e vrasjes aksidentale të tij të inskenuar nga forcat serbe.

Thaçi, përmes një postimi në Facebook, ka thënë se vrasja e tij mbetet një prej vrasjeve më misterioze në historinë e heronjve tanë, por i mistershëm nuk do të mbetet asnjëherë kontributi i madh i Mehë Ukës për lirinë tonë dhe unitetin kombëtar.

Postimi i plotë i Thaçit:

“Sot kujtojmë Heroin e Kosovës, Mehë Ukën, të cilit para 23 vjetësh i ishte inskenuar vrasja aksidentale në një pritë nga forcat serbe. Mehë Uka ishte vizionar dhe atdhetar i dëshmuar. Ai kaloi shumë vite në burg si i burgosur politik, sepse ishte gjithmonë në ballë të protestave studentore dhe çdo organizimi për lirinë e popullit tonë. Vrasja e tij mbetet një prej vrasjeve më misterioze në historinë e heronjve tanë, por i mistershëm nuk do të mbetet asnjëherë kontributi i tij i madh për lirinë tonë dhe unitetin kombëtar”, ka shkruar Thaçi. /Telegrafi/